Cyngor yn dathlu hyfforddwyr ifanc a llysgenhadon chwaraeon

Dathlodd Cyngor Bro Morgannwg grŵp o hyfforddwyr ifanc a llysgenhadon chwaraeon ledled y sir yn ystod digwyddiad arbennig yn y Barri yn ddiweddar.

• Dydd Llun, 24 Mis Mawrth 2025

  Bro Morgannwg

Roedd y noson yn cydnabod llwyddiannau unigolion oedd yn ymwneud â dau brosiect — Hyfforddwyr y Dyfodol a Llysgenhadon Chwaraeon Ifanc.

Nod Hyfforddwyr y Dyfodol yw ysbrydoli cenhedlaeth o hyfforddwyr ifanc ac yn annog pobl ifanc i ddod yn fwy egnïol, tra bod Llysgenhadon Chwaraeon Ifanc yn rhan o raglen genedlaethol sy'n ceisio grymuso ac ysbrydoli pobl ifanc i ddod yn arweinwyr drwy chwaraeon.

Ymunodd yr Olympiwr a'r bocsiwr o Gymru, Rosie Eccles, â'r dathliadau yng Nghanolfan y Celfyddydau Memo hefyd.

Dywedodd y Cynghorydd Gwyn John, Aelod Cabinet dros Hamdden, Chwaraeon a Llesiant: “Roedd yn fraint mynychu'r dathliad yn anrhydeddu'r bobl ifanc uchelgeisiol hyn.

“Mae'r mentrau hyn yn agor byd o gyfleoedd hyfforddi a datblygu, gan helpu pobl ifanc ledled y Fro i ddod yn arweinwyr ac ysbrydoli eraill i gymryd rhan mewn chwaraeon.

“Mae eu llwyddiant yn adlewyrchu ymrwymiad y Cyngor i wella llesiant, gan wneud y Fro yn lle gwych i fyw drwy rymuso ieuenctid i fyw bywydau iachach, mwy egnïol.”

O ganlyniad i raglenni Hyfforddwyr y Dyfodol a Llysgenhadon Ifanc, mae dros 1600 o blant a phobl ifanc wedi bod yn rhan o leiaf 150 o wahanol sesiynau a digwyddiadau ymgysylltu ers mis Ebrill y llynedd.

Mae'r rhaglenni hyn bellach wedi cyfrannu at dros 1200 o oriau gwirfoddol hefyd.