Cwblhau murluniau gardd Gladstone

Gall Cyngor Bro Morgannwg gyhoeddi bod dau furlun celf wedi'u cwblhau yng Ngerddi Gladstone.

• Dydd Iau, 22 Mis Mehefin 2023

  Bro Morgannwg

Trwy broses ddethol agored, dewiswyd yr artist Grant Radford i ddylunio a phaentio'r ddau furlun. Cafodd y dasg o greu dyluniadau a fyddai'n adlewyrchu gwahanol gymeriadau a defnyddiau'r ddwy ardd.

Treuliodd Grant ddiwrnod gyda disgyblion Ysgol Gynradd Gladstone, i hwyluso gweithdy ar ddarlunio ffurfiau blodeuog.

Cyfarfu hefyd â thrigolion Golau Caredig dros goffi i glywed eu hatgofion am Erddi Gladstone. Roedd yr Ardd Isaf yn arfer cael ei galw'n 'barc dall' ac roedd arwyddion Braille gydag enwau'r planhigion.

Yn ddiweddar mae cyfleusterau chwaraeon a chwarae newydd wedi’u gosod yn yr ardd uchaf ac mae'r murlun cyfagos yn adlewyrchu'r rhain.

Cwblhaodd Grant a'i dîm o helpwyr, gan gynnwys gwirfoddolwr o gronfa wirfoddolwyr Canolfan Gelf y Memo, y murluniau ddiwedd mis Mai eleni.

Nodwyd bod y waliau'n lleoliad delfrydol ar gyfer murlun ac roedd cyllid Adran 106 ar gael ar gyfer celf gyhoeddus yn yr ardal i sicrhau hyn.

Dywedodd y Cynghorydd Rhiannon Birch: “Mae hwn yn ychwanegiad gwych i'r gerddi hardd yn Gladstone.

 

“Rydym yn gobeithio y bydd y murluniau'n dod â'r cymunedau lleol ynghyd i fwynhau a gwerthfawrogi'r gwaith celf.

 

“Mae cyllid Adran 106 yn galluogi'r cyngor i gyflawni'r prosiectau hyn a gwneud gwelliannau enfawr i olwg y Fro.”

I gael mwy o wybodaeth am y prosiect hwn, ewch i wefan Celf o gwmpas y dref