Y Cyngor yn ennill gwobr yng Nghynhadledd Ystadau
Bu Cyngor Bro Morgannwg yn dathlu yn ddiweddar ar ôl ennill gwobr yng Nghynhadledd Ystadau Cymru.
Cynhaliwyd y seremoni wobrwyo, a gynhaliwyd yn rhithiol, ddydd Iau 1 Rhagfyr.
Y Cyngor enillodd y wobr am 'Ddarparu Gwerth Cymdeithasol', mewn partneriaeth â Chymdeithas Pentref Aberogwr am gael effaith sylweddol ar y gymuned y mae'n ei gwasanaethu.
Wrth roi y wobr, cydnabu Ystadau Cymru y gwaith a wnaed gan y Cyngor wrth helpu i ddarparu neuadd bentref aml-bwrpas yn Aberogwr.
Mae neuadd y pentref ar safle toiled cyhoeddus a fu unwaith yn segur ac fe'i hariannwyd drwy gyllid adran 106.
Mae arian adran 106 yn gyfraniadau ariannol a roddir i'r Cyngor gan gwmnïau sy'n adeiladu datblygiadau cyfagos i'w defnyddio ar brosiectau cymunedol.
Gellir defnyddio neuadd y pentref ar gyfer chwaraeon dan do, dosbarthiadau cadw'n heini, priodasau, cyngherddau a mwy. Mae hefyd yn cynnal crèche i hyd at 25 o blant.
Dywedodd Y Cynghorydd Bronwen Brooks, Dirprwy Arweinydd ac Aelod Cabinet dros Leoedd Cynaliadwy: "Rwy'n falch iawn bod y prosiect yma'n cael ei ddathlu. Mae'n enghraifft wych o gydweithrediad rhwng y Cyngor a'r gymuned ac yn enghraifft wych o arfer da ar gyfer trosglwyddo asedau cymunedol.
"Gobeithio bydd yr adeilad hwn yn mynd ymlaen i fod yn gaffaeliad llewyrchus i'r gymuned leol."
Dywedodd cynrychiolydd o Gymdeithas y Neuadd Bentref: "Mae aelodau o'n Cymuned wedi gweithio'n wirfoddol ers blynyddoedd lawer i ddarparu'r cyfleuster gwych hwn. Mae'r neuadd yn cael ei defnyddio gan ddemograffeg eang o'r gymuned bron bob dydd o'r wythnos, ac rydym bellach yn cynnal priodasau. Mae'n bleser gweld pobl nawr yn defnyddio'r hyn sy'n gyfleuster cymunedol gwych gyda golygfeydd anhygoel ar draws Môr Hafren.
"Rydym yn falch iawn bod y Cyngor wedi cael ei gydnabod gan Ystadau Cymru am brosiect Gwerth Cymdeithasol gorau'r flwyddyn, wrth i dîm Ystadau'r Cyngor ynghyd â swyddogion eraill ac aelodau'r Cyngor, ynghyd â Llywodraeth Cymru, ddarparu cefnogaeth sylweddol dros y blynyddoedd i Gymdeithas y Neuadd Bentref er mwyn galluogi'r prosiect hwn i fwrw 'mlaen."
Roedd Ysgol Gynradd Trwyn y De hefyd ar y rhestr fer ar gyfer gwobr yn y categori 'Dangos Cynaliadwyedd Amgylcheddol'.