Strategaeth Coed

Mae Strategaeth Coed 2024-2039 yn nodi'r ffordd y bydd y Cyngor yn rheoli ac yn gwella coed ym Mro Morgannwg dros y 15 mlynedd nesaf, gan gynnwys ymrwymiad i gynyddu gorchudd y canopi 7.5% erbyn 2039.
 
Mae coed a Choetiroedd yn rhan bwysig o dirweddau trefol a gwledig Bro Morgannwg. 
 
Mae'r Strategaeth hon yn edrych ar sut y bydd y Cyngor yn diogelu, rheoli a chynyddu gorchudd canopi coed yn y Fro er mwyn meithrin gwydnwch, mynd i'r afael â newid yn yr hinsawdd a cholli bioamrywiaeth gan fod coed yn rhan annatod o'n hamgylchedd ac mae ganddynt rôl allweddol wrth fynd i'r afael â newid yn yr hinsawdd.
 
Ym mis Gorffennaf 2019, ymunodd y Cyngor â Llywodraeth Cymru ac Awdurdodau Lleol eraill ledled y DU wrth ddatgan Argyfwng Hinsawdd mewn ymateb i Adroddiad Panel Rhynglywodraethol y Cenhedloedd Unedig ar Newid yn yr Hinsawdd i effaith cynhesu byd-eang.
 
Yn ogystal â hyn ym mis Gorffennaf 2021, datganodd y Cyngor Argyfwng Natur yn dilyn adroddiad Rhwydwaith Bioamrywiaeth Cenedlaethol (NBN) `Cyflwr Natur 2019` a ganfu fod 8% o rywogaethau a geir yng Nghymru (523) yn cael eu bygwth o ddifodiant o Brydain, 17% (666) yn cael eu bygwth o ddifodiant o Gymru ac mae 73 eisoes wedi darfod.
 
Mae'r Cyngor wedi ffurfio'r Strategaeth Coed hon fel rhan o Brosiect Zero, cynllun y Cyngor i ddod yn garbon niwtral erbyn 2030, gan fod gan goed, coetiroedd a gwrychoedd rôl hanfodol wrth fynd i'r afael ag eithafion hinsawdd a cholli bioamrywiaeth.
 
Yn ogystal â lliniaru colli bioamrywiaeth a newid yn yr hinsawdd, mae coed hefyd yn ffordd gost-effeithiol o wella ansawdd yr amgylchedd o fewn ein trefi a'n pentrefi, gan sicrhau manteision corfforol, lles cymdeithasol ac economaidd. 
 
Cynhaliwyd ymgynghoriad cyhoeddus ar y Strategaeth Goed ddrafft o fis Ionawr - Ebrill 2024. Roedd yr ymgynghoriad ar ffurf holiadur, a dadansodwyd ymatebion a'u defnyddio i lywio fersiwn derfynol y Strategaeth Coed.