Gwaith I Ddechrau A Gyfadeilad Bwyty Newydd Yn Y Barri
Mae Cyngor Bro Morgannwg wedi cyhoeddi y bydd y gwaith o ailddatblygu’r hen gyfleusterau cyhoeddus ar Nell’s Point yn dechrau’n fuan.
Mewn partneriaeth â’r datblygwyr Next Colour – y cwmni y tu ôl i gynllun Oyster Wharf yn y Mwmbwls – byddai’r prosiect yn gweld yr adeilad Fictoraidd 100 oed yn cael ei drawsnewid yn bedair uned fasnachol.
Mae nifer o enwau uchel eu proffil wedi mynegi diddordeb mewn agor allfeydd ar y safle, sy'n cynnwys bwyty 4000 troedfedd sgwâr a chaffi a/neu uned fasnachol ar yr islawr.
Mae’r bwyty eisoes wedi’i neilltuo i’r gadwyn bar coffi Loungers, sydd eisoes â changhennau ledled De Cymru a De-ddwyrain Lloegr – gan gynnwys Ocho Lounge ym Mhenarth.
Byddai busnesau sydd wedi’u lleoli ar y safle yn mwynhau golygfeydd godidog dros Fae Whitmore ac aber yr Afon Hafren gan ei fod yn eistedd yn berffaith ar hyd Llwybr Arfordir Cymru.
Roedd y datblygiad wedi’i ohirio i ddechrau oherwydd pandemig Covid-19 yn ogystal ag ymchwiliadau i sefydlogrwydd y strwythur.
Dywedodd y Cynghorydd Lis Burnett, Arweinydd Cyngor Bro Morgannwg: “Rwy’n falch iawn o weld bod gwaith yn symud ymlaen o’r diwedd i ailddatblygu’r hen gyfleusterau cyhoeddus yn Ynys y Barri.
“Bu nifer o rwystrau i gyrraedd y pwynt hwn, gan gynnwys effeithiau’r pandemig Covid-19.
“Fodd bynnag, rydym wedi gweithio’n agos mewn partneriaeth â’r datblygwyr Next Colour i gael y prosiect hwn i symud cyn gynted â phosibl, fel y gallwn barhau i wella’r ardal ar gyfer ein trigolion a’n hymwelwyr.”
Amcangyfrifir y bydd uwchraddio'r adeilad rhestredig Gradd II yn cymryd tua 10 mis i'w gwblhau unwaith y bydd y gwaith adeiladu wedi dechrau - yn amodol ar gymeradwyaeth ddisgwyliedig Caniatâd Adeilad Rhestredig gan CADW.
Dywedodd James Morse, Prif Swyddog Gweithredol Next Colour: “Mae wedi bod yn daith gymhleth i ddwyn y prosiect hwn i ffrwyth, yn enwedig o ran effeithiau COVID-19 ar y diwydiant lletygarwch yn ei gyfanrwydd.
“Roedd cydnabod cyflwr yr adeilad rhestredig Gradd II hwn a diffyg adeiladu gwreiddiol cynhenid yn golygu ein bod wedi gorfod dod o hyd i atebion cyn y gallai'r gwaith ddechrau.
“Mae hon wedi bod yn ymdrech gyfunol rhyngom ni, Cyngor Bro Morgannwg a Grŵp Loungers – heb gymorth a phenderfyniad ein partneriaid – byddai’r prosiect yn dal i fod ar y bwrdd darlunio.
“Rydym yn edrych ymlaen at gynnydd sydd ar fin digwydd a gobeithio y bydd y bwyty yn agor yn fuan.”