Ymwelodd Arweinydd Cyngor Bro Morgannwg â Siop 'Gift that Matters' Marie Curie yn ystod y Great Daffodil Appeal
Ymwelodd Lis Burnett, Arweinydd y Cyngor, â siop elusen Marie Curie ar Windsor Road, Penarth, fel rhan o'u Great Daffodil Appeal.
Mae'r apêl yn ymgyrch codi arian flynyddol gan yr elusen i helpu i sicrhau bod pawb yn cael y gofal a'r gefnogaeth arbenigol y maent yn eu haeddu yn ystod gofal diwedd oes.
Daeth y Cynghorydd Burnett i'r siop elusen unigryw i ddarganfod mwy am y gwaith y mae Marie Curie yn ei wneud ar draws De Cymru ac yn Hosbis Caerdydd a'r Fro ym Mhenarth, gan gynnwys y ffyrdd y gall pobl gefnogi Marie Curie.
Bydd siopwyr sy'n prynu 'eitem hanfodol' yn cael cerdyn diolch y gallant ei gadw neu ei roi i anwylyd fel anrheg. Bydd pob pryniant yn mynd tuag at eitem debyg sydd ei hangen ar Hosbis Marie Curie Caerdydd a'r Fro - sydd ond hanner milltir i ffwrdd o'r siop - i helpu i ddarparu gofal a chymorth arbenigol i bobl leol.
Dywedodd y Cynghorydd Lis Burnett: "Mae angen y gwaith mae Marie Curie yn ei wneud nawr yn fwy nag erioed. Dyna pam rwy'n annog pobl ledled De Cymru i ddangos eu cefnogaeth i'r siop elusennol unigryw hon mewn unrhyw ffordd y gallant.
"Mae pob rhodd yn golygu, pan ddaw'r amser, y gall Marie Curie fod yno i bobl a'u hanwyliaid pan fydd eu hangen arnynt fwyaf."
Dywedodd Tomos Evans, Rheolwr Polisi a Materion Cyhoeddus Marie Curie: "Diolch i'r Cynghorydd Lis Burnett am gymryd yr amser i ymweld â'n siop dros dro, 'Gift that Matters'.
Roeddem am greu gofod sy'n tynnu sylw at yr eitemau ystyrlon ac ingol sy'n dangos sut mae Marie Curie yn gofalu am bobl a'u cefnogi ar yr adegau mwyaf heriol yn eu bywydau.
"Mae hon yn siop unigryw lle gallwch brynu eitemau hanfodol i helpu i gefnogi pobl â salwch angheuol a'u teuluoedd a'u gofalwyr. Mae popeth rydych chi'n ei brynu - i chi’ch hun neu un o’ch anwyliaid - yn mynd yn syth i'r rhai sydd ei angen fwyaf.”
Marie Curie yw prif elusen diwedd oes y DU ac mae’n darparu gofal diwedd oes arbenigol i bobl ag unrhyw fath o salwch angheuol ac yn cefnogi eu teulu a'u ffrindiau mewn hosbisau a gartref.
Gall ymwelwyr â'r siop hefyd siarad â staff neu wirfoddolwyr Marie Curie i gael gwybod mwy am wasanaethau Marie Curie neu sut i gefnogi'r elusen gan gynnwys Llinell Gwybodaeth a Chymorth Marie Curie, Cymorth Profedigaeth, Codi Arian, Gwirfoddoli, Partneriaethau Corfforaethol, a Rhoddion mewn Ewyllysiau.
Bydd y siop 'Gift that Matters' ar agor rhwng 11 a 24 Mawrth (o 9.30am tan 5pm o ddydd Llun i ddydd Sadwrn ac o 10am tan 4pm ar ddydd Sul. Bydd yr holl roddion o'r siop hon yn ariannu gofal a chymorth Marie Curie yn Ne Cymru.
Os ydych chi'n byw gyda salwch angheuol neu wedi cael eich effeithio gan farwolaeth a phrofedigaeth, gall Marie Curie helpu. Ewch i www.mariecurie.org.uk neu ffoniwch y llinell gymorth am ddim ar 0800 090 2309.