Y Cyngor yn gosod arwyneb newydd ar Heol yr Isffordd a’r llwybr troed

Mae Cyngor Bro Morgannwg wedi buddsoddi £100,000 i wella cyflwr Heol yr Isffordd ar gyfer cerddwyr a cherbydau.

• Dydd Gwener, 07 Mis Gorffenaf 2023

  Bro Morgannwg

Ar ôl i'r ffordd ddod dan reolaeth y Cyngor yn gynharach eleni, aeth y Tîm Priffyrdd ati i gynnal rhaglen o waith adnewyddu yn ystod mis Mai.

Roedd hyn yn cynnwys llenwi tyllau cyn gosod arwyneb newydd ar y ffordd gyfan, gyda'r llwybr troed hefyd wedi'i uwchraddio.

Roedd y ffordd wedi bod yn eiddo preifat yn y gorffennol ac yn ystod y cyfnod hwnnw dirywiodd ei chyflwr. Roedd ei gwella yn cael ei ystyried yn flaenoriaeth i'r Cyngor gan ei bod yn darparu cyswllt hanfodol rhwng Dock View Road a gorsaf drenau Dociau'r Barri.

Dwedodd y Cynghorydd Mark Wilson, Aelod Cabinet Cyngor Bro Morgannwg dros Wasanaethau Cymdogaeth ac Adeiladau:  "Mae Tîm Priffyrdd y Cyngor yn gwneud gwaith atgyweirio ffyrdd a phalmentydd yn rheolaidd ledled y Sir.

"Ar hyn o bryd rydym yn gweithio drwy amserlen o welliannau, ond ystyriwyd hyn yn fater brys oherwydd ei leoliad pwysig ger gorsaf drenau Dociau'r Barri.

"Bydd y gwaith, a oedd yn golygu uwchraddio'r ffordd a'r llwybr troed yn sylweddol, o fudd i gerddwyr, beicwyr a gyrwyr, gan wneud eu teithiau ar hyd Heol yr Isffordd yn fwy cyfforddus."

Gall preswylwyr roi gwybod i’r Cyngor am dyllau sydd angen sylw drwy adrodd amdanynt ar y wefan.