Penarth i gynnal digwyddiad syrcas a pherfformiad dawns fis nesaf
Mae'n bleser gan y tîm Twristiaeth a Digwyddiadau yng Nghyngor Bro Morgannwg gyhoeddi sioe weledol 'I'r Môr' 'To the Sea', sy'n cynnwys perfformiadau ac adloniant gwych ar hyd Pier Penarth, yr Esplanâd a chanol tref Penarth.
Bydd y digwyddiad a ariennir drwy Gronfa Ffyniant Gyffredin Llywodraeth y DU yn cael ei gynnal ddydd Sadwrn, 16 Medi.
Mae cwmni celfyddydau cymunedol lleol ‘Splatch Production’ wedi cael eu comisiynu i gynnal dathliad o'r celfyddydau.
Bydd y diwrnod yn cynnwys nifer o berfformiadau syrcas a dawns ymdrochol gan gynnwys cymeriadau cerdded, perfformwyr stryd a thaith gerdded rhaff dynn ysblennydd ar draws y môr yn ddiweddarach gyda'r nos.
Bydd y perfformwyr yn tynnu ar y cymeriadau, y gymuned a'r hanes o amgylch Pier Penarth.
Bydd bws am ddim hefyd ar gael i ymwelwyr i gysylltu'r ardaloedd siopa a bwyta a gweld y perfformwyr byw a'r diddanwyr syrcas o ganol tref Penarth i'r Esplanâd.
Dywedodd y Cynghorydd Lis Burnett, Arweinydd Cyngor Bro Morgannwg: "Rwy'n falch iawn o weld y digwyddiad hwn ym Mhenarth gan ei fod nid yn unig yn arddangos un o'r golygfeydd mwyaf trawiadol yn y rhanbarth i ymwelwyr, ond mae hefyd yn dwyn ynghyd yr amrywiaeth o fusnesau annibynnol gwych yn y dref wrth ddathlu ein lleoliad fel un o'r cyrchfannau ymwelwyr gorau yng Nghymru.
"Mae’r tîm Twristiaeth a Digwyddiadau yn gweithio gyda Grŵp Busnes Penarth, a Chyngor Tref Penarth i gryfhau'r cysylltiadau rhwng digwyddiadau canol y dref a busnesau lleol i godi ymwybyddiaeth o bobl leol ac ymwelwyr fel ei gilydd i 'ddangos cariad a siopa'n lleol'."
Dywedodd John Davies, Cadeirydd Grŵp Busnes Penarth a pherchennog Milkshed Workspaces a Chylchgrawn Penarth View: "Mae Busnesau Penarth yn croesawu 'I'r Môr' 'To the Sea' fel digwyddiad arddangos sy'n amlygu Penarth i ymwelwyr hen a newydd.
Rydym yn llawn cyffro i groesawu ymwelwyr i'n tref ac yn croesawu'r cyfle i weithio mewn partneriaeth â Chyngor Bro Morgannwg i gynnal y digwyddiad gwych hwn."
Bydd mwy o fanylion am ddigwyddiadau gan gynnwys amseroedd perfformiad, lleoliadau, mapiau a manylion y gwasanaeth bws am ddim i gyd yn cael eu rhannu drwy'r sianeli cyfryngau cymdeithasol @AYmweld wrth iddynt gael eu cyhoeddi. ar dudalen y digwyddiad
Dyma un o gyfres o ddigwyddiadau a ddatblygwyd i gefnogi pob un o drefi Bro Morgannwg i ddatblygu digwyddiadau arddangos sy'n cefnogi canol trefi.