Datgelu gosodiad gwaith celf cyhoeddus yn y Dingle

Mae mainc thema bywyd gwyllt wedi’i gosod yn y Dingle ym Mhenarth, diolch i brosiect wedi’i drefnu gan Gyngor Bro Morgannwg.

• Dydd Gwener, 14 Mis Hydref 2022

  Bro Morgannwg

Cymerodd dros 120 o ddisgyblion o ysgolion cynradd Albert Road a Cogan ran mewn gweithdy dylunio natur gyda’r artist lleol, David Mackie. Wedyn, cafodd y dyluniadau eu cwblhau gyda mewnbwn gan drigolion lleol.

Mae’r cerflun pwrpasol yn nodi’r bywyd gwyllt amrywiol sy’n byw yn y gofod ac sy’n ymweld ag ef. Mae’r darluniadau’n cynnwys anifeiliaid brodorol fel morgrug, pili-palod ac adar, yn ogystal â chreaduriaid chwedlonol fel coblynnod. Mae’r prosiect yn cynnig lle i eistedd a nodweddion i’w darganfod a’u trafod.

Mae’r fainc wedi’i gwneud o ddur a phren caled sy’n ddeunyddiau cadarn na fydd angen eu cynnal a’u cadw’n fawr. Mae’r dyluniadau wedi’u hysgythru yn y pren caled a’u llenwi gyda phaent i’w gwneud yn fwy clir.

Gall ymwelwyr ddod o hyd i’r darn ger y parc ar ochr ogleddol y Dingle.

Cafodd y prosiect ei ariannu gan arian A106 Penarth Heights. Mae arian A106 yn dod o ddatblygwyr ac yn mynd tuag at gostau darparu seilwaith cymunedol a chymdeithasol yn dilyn datblygiad newydd.

Dywedodd yr Aelod Cabinet dros Wasanaethau Cymdogaeth, y Cynghorydd Mark Wilson: “Rydym yn falch o weld y darn gwych hwn yn cael ei gwblhau ar ôl yr oedi oherwydd Covid. Mae’r prosiect o ganlyniad i greadigrwydd a chydweithrediad rhai o aelodau ieuengaf ein cymuned.

“Bydd yn rhoi i’r gymuned rywle i eistedd a mwynhau natur ac i gysylltu â’r ardal o’i chwmpas. Mae hefyd yn tynnu sylw at bwysigrwydd mentrau fel Prosiect Sero wrth ddiogelu’r mannau hyn fel bod modd eu mwynhau am flynyddoedd i ddod.”