Cyngor yn cytuno ar system teledu cylch cyfyng newydd a gwell

Bydd rhwydwaith teledu cylch cyfyng Bro Morgannwg yn cael ei uwchraddio fel rhan o gytundeb ar y cyd â Chyngor Caerdydd a Chomisiynydd yr Heddlu a Throseddu.  

• Dydd Mawrth, 15 Mis Mawrth 2022

  Bro Morgannwg

Wedi'i gymeradwyo gan Gabinet y Cyngor ddydd Llun, bydd y cytundeb newydd yn gweld y 78 o gamerâu sefydlog yn cael eu huwchraddio ar draws Y Barri, Penarth a Llanilltud Fawr, a gosod camerâu newydd ar Kings Square Y Barri, Rhodfa Penarth ac yn y Bont-faen.  

Bydd y camerâu'n cael eu monitro 24/7 ledled y Fro drwy gydweithio â Chyngor Caerdydd ac am y tro cyntaf, bydd gallu gwylio ychwanegol yn cael ei roi ar waith yng Ngorsaf Heddlu'r Barri.  Bydd hyn yn rhoi'r gallu i'r Cyngor a Heddlu De Cymru ymateb i faterion yn gyflym a gweithio mewn partneriaeth i roi atebion amser real ar waith i broblemau lleol.   

Dywedodd y Cynghorydd Eddie Williams, yr Aelod Cabinet dros Wasanaethau Cyfreithiol, Rheoliadol a Chynllunio: "Mae system deledu cylch cyfyng effeithiol yn rhan bwysig o gadw pobl yn ddiogel yn y byd modern.  
 
"Gall gweithrediad o'r fath helpu i nodi'r sawl sy'n cyflawni trosedd, ond yn bwysicach fyth, mae'n rhwystr, gan annog pobl i beidio â chyflawni troseddau o'r fath yn y lle cyntaf.  

 "Mae'r Fro yn parhau i fod yn lle hynod o ddiogel i fyw ynddo.  Gobeithiwn y bydd gweithredu'r gwasanaeth newydd hwn, mewn partneriaeth â Chyngor Caerdydd a'r Heddlu, yn helpu i'w gadw felly."  

 

Bydd y system newydd yn cael ei hariannu gan Gomisiynydd yr Heddlu a Throseddu a Chyngor Bro Morgannwg.  Bydd arian yn cael ei wario ar uwchraddio camerâu presennol, gosod rhai newydd, ac uwchraddio neu adnewyddu'r offer monitro a'r seilwaith cyfan sydd y tu ôl i'r gwasanaeth teledu cylch cyfyng.   Bydd y camerâu'n cael eu monitro gan Gyngor Caerdydd yn eu Canolfan Reoli bresennol a fydd hefyd yn cael eu huwchraddio drwy gydol y flwyddyn.    

Dywedodd Alun Michael, Comisiynydd yr Heddlu a Throseddu De Cymru: "Mae cryfhau trefniadau diogelwch cymunedol ar draws De Cymru yn flaenoriaeth i mi fel y nodir yng Nghynllun yr Heddlu a Throseddu ac rwy'n falch iawn y bydd ein gwaith cydweithredol yng Nghaerdydd a'r Fro yn arwain at y gwelliannau hyn mewn darllediadau teledu cylch cyfyng a fydd yn chwarae rhan yn y gwaith o gadw pobl yn ddiogel ac atal a chanfod troseddau. 

 "Rydym wedi gweld rhai o'r troseddau mwyaf difrifol o drais yn cael eu canfod a phobl yn cael eu dwyn i gyfiawnder drwy waith da swyddogion yr heddlu a gweithredwyr teledu cylch cyfyng ac rwy'n gobeithio y bydd y sylw a'r monitro gwell ar y camerâu hefyd yn gwneud i bobl feddwl ddwywaith cyn cyflawni troseddau. 

 "Mae'n bwysig ymateb yn gyflym ac yn dda pan fydd pethau drwg yn digwydd ond mae hyd yn oed yn well os gallwn atal pethau drwg rhag digwydd yn y lle cyntaf ac mae teledu cylch cyfyng yn chwarae rhan bwysig yn y dystiolaeth o ran dala troseddwyr ac yn y gwaith hanfodol o atal".