Achos Ffliw Adar wedi'i Gadarnhau yng Ngerddi’r Cnap, Y Barri

Mae Cyngor Bro Morgannwg yn gweithio gyda'r Asiantaeth Iechyd Anifeiliaid a Phlanhigion (APHA) i ymchwilio i farwolaethau elyrch yn ddiweddar yn Llyn y Cnap, y Barri.  Cadarnhawyd bod un o'r carcasau wedi profi'n bositif ar gyfer Ffliw Adar H5N1.

• Dydd Iau, 17 Mis Chwefror 2022

  Bro Morgannwg

Mae'r Cyngor yn gweithio i leihau'r risg o drosglwyddo ymhellach yn y Cnap a'n parciau a pharciau gwledig eraill. Mae ffliw adar yn ymledu o aderyn i aderyn drwy gyswllt uniongyrchol neu drwy hylifau ac ysgarthion y corff halogedig. 

Gellir ei ledaenu hefyd gan borthiant a dŵr halogedig, neu gan gerbydau budr, dillad ac esgidiau.  

Mae Ffliw Adar yn effeithio'n bennaf ar adar. Mae'n anghyffredin iawn i'r feirws gael ei drosglwyddo o adar i bobl, neu famaliaid eraill. Mae'r risg i iechyd y cyhoedd yn isel iawn. Fel mesur rhagofalus, mae'r Cyngor yn gofyn i bob aelod o'r cyhoedd beidio â bwydo’r adar â llaw yn unrhyw un o'n parciau neu barciau gwledig.

Os byddwch yn dod o hyd i adar y dŵr gwyllt marw (elyrch, gwyddau neu hwyaid) neu adar gwyllt marw eraill, fel gwylanod neu adar ysglyfaethus, dylech roi gwybod i APHA ar 03459 33 55 77. 

Dylid hefyd roi gwybod am unrhyw adar sy'n amlwg yn sâl drwy'r rhif hwn ac ni ddylid cyffwrdd â nhw na'u trin.