Cyfeiriad newydd i Kymin Penarth
MAE Cyngor Bro Morgannwg yn cynllunio ffordd newydd ymlaen i Kymin Penarth ar ôl ystyried yn ofalus geisiadau i weithredu'r adeilad a rhannau o'r ardd ar brydles hirdymor.
Er bod llawer o nodweddion diddorol yn y cynigion a gyflwynwyd, nid oedd yr un ohonynt yn gwbl fodlon ar weledigaeth y Cyngor ar gyfer Kymin, sef cynigion i sicrhau bod y tŷ a'r gerddi yn elwa o ddyfodol cynaliadwy a fyddai hefyd o fudd i'r gymuned leol ac ehangach.
O ganlyniad, mae'r Cyngor bellach yn bwriadu cadw rheolaeth dros y tŷ a'r gerddi ac archwilio ffyrdd y gellir rhoi dyfodol cynaliadwy i'r rhain er budd trigolion ac ymwelwyr fel ei gilydd.
Yn cael ei annog gan y cyfleoedd sydd ar gael ar gyfer Pafiliwn Pier Penarth, y mae'r Cyngor wedi bod yn ei reoli ers mis Chwefror, gellid mabwysiadu dull tebyg ar gyfer yr eiddo hwn.
Gallai hynny weld y Kymin yn cael ei ddefnyddio ar gyfer cyfuniad o weithgareddau masnachol a chymunedol, gyda'r posibilrwydd o sefydlu math o fenter gymdeithasol yn dilyn llwyddiant Caffi Ffres Mawr y pafiliwn.
Bydd gwaith yn mynd rhagddo yn awr i ddatblygu cynlluniau a nodi ffynonellau cyllid posibl i fuddsoddi yn y lleoliad er budd pawb.
Dywedodd y Cynghorydd Lis Burnett, Aelod Cabinet Cyngor Bro Morgannwg dros Addysg ac Adfywio: "Hoffwn ddiolch i'r rhai a gyflwynodd geisiadau am eu diddordeb yn y Kymin. Yn anffodus, nid oedd yr un ohonynt yn bodloni ein disgwyliadau ar gyfer yr adeilad yn llwyr ac, yn dilyn y profiad o weithredu Pafiliwn Pier Penarth, rydym wedi penderfynu mynd i gyfeiriad newydd.
"Mae gweithredu'r pafiliwn wedi creu cyfle i fynd ati i reoli'r ddau adeilad hyn gyda'i gilydd. Byddwn yn anelu at adeiladu ar yr hyn rydym wedi'i ddysgu o'n profiad gyda'r pafiliwn dros y tri mis diwethaf, a'r ymgynghoriad cyhoeddus diweddar ar ei ddefnydd yn y dyfodol, er mwyn sicrhau y bydd Kymin o fudd gwirioneddol i drigolion lleol.
"Mae'n amlwg bod pobl Penarth yn poeni'n fawr am yr adeiladau hanesyddol yn eu tref ac rydym yn teimlo'r un mor gryf. Yr her yw sicrhau y gall y lleoliadau eiconig hyn weithredu'n gynaliadwy ac rydym yn agored i gydweithio â sefydliadau lleol a grwpiau cymunedol tuag at yr amcan hwnnw."