Presenoldeb yn yr Ysgol

Mae'r cyngor yn gweithio gydag ysgolion i annog disgyblion a’u rhieni i wneud presenoldeb yn yr ysgol bob dydd yn flaenoriaeth, mewn ymgais i ddod â phresenoldeb yn ôl i fyny i fwy na 95% ledled y sir.

Ers pandemig COVID-19 mae presenoldeb yn yr ysgol wedi gostwng 5%, ar gyfartaledd, mewn ysgolion cynradd a 10% mewn ysgolion uwchradd.

• Pam mae presenoldeb yn yr ysgol mor bwysig?
  Mae ysgolion yn cynnig cymaint o gyfleoedd i ddiwallu anghenion cymdeithasol, emosiynol ac addysgol person ifanc a gall presenoldeb gwael leihau cyfleoedd i blant a phobl ifanc yn y dyfodol yn y pen draw, a chynyddu’r risg o fod yn NEET (pobl nad ydynt mewn addysg, cyflogaeth na hyfforddiant).

• Beth mae'r cyngor yn ei wneud i wella presenoldeb?

  Mae'r cyngor wedi ymgynghori â phobl ifanc ar y mater hwn, ac maen nhw wedi bod yn sbardun wrth ddylunio ymgyrch newydd i annog teuluoedd, plant a phobl ifanc i roi presenoldeb yn yr ysgol ar flaen eu meddyliau, ac i atgoffa pawb o beth sydd i'w ennill drwy bresenoldeb da yn yr ysgol.

   

  Y prif negeseuon yw Presenoldeb Da ar gyfer Dyfodol Disglair a #ColliYsgolColliAllan Mae hyn yn ychwanegol at y gefnogaeth y mae'r Tîm Cynhwysiant Ysgolion yn ei chynnig i ysgolion, disgyblion a'u rhieni. 

• Beth ydych chi'n gobeithio’i gyflawni drwy'r ymgyrch hon?

  Rydyn ni eisiau gweld sylw canolog ar bresenoldeb eto, ac i deuluoedd a'u plant anelu'n uchel. Rydym yn ymwybodol o'r amgylchiadau sensitif ac anodd iawn a all atal rhai pobl ifanc rhag dod i'r ysgol yn rheolaidd ac mae cymorth ar gael bob amser i helpu yn yr amgylchiadau hyn, ond mae angen gwella presenoldeb cyffredinol.  

   

  Mae 95% yn swnio'n uchel i fod yn darged ond mae hynny'n dal i ganiatáu absenoldeb am chwe diwrnod yn y flwyddyn ysgol os oes angen oherwydd salwch ac mae'r targed hwn yn gyraeddadwy i'r mwyafrif o bobl ifanc.

   

  Rydyn ni eisiau gweld presenoldeb yn gwella fel bod pob person ifanc yn y Fro yn ymgysylltu â'u hysgol a'u haddysg ac yn gallu ffynnu mewn bywyd drwy fanteisio ar yr holl gyfleoedd y mae ysgolion yn eu cynnig. 

• Pa gefnogaeth ydych chi'n ei darparu i ysgolion, disgyblion neu rieni?

  Mae ein Tîm Cynhwysiant Ysgolion yn gweithio'n agos gydag ysgolion i wella presenoldeb drwy weithio gyda theuluoedd a phobl ifanc i oresgyn unrhyw faterion sydd wedi dod yn rhwystrau i fynychu'r ysgol a dathlu'r disgyblion hynny sydd wedi cynnal presenoldeb da. 

   

  Rydyn ni’n gofyn i ysgolion bwysleisio’r negeseuon allweddol yn yr ymgyrch hon ac wedi darparu baneri finyl i bob ysgol eu harddangos y tu allan i'w prif fynedfa a phecyn cymorth digidol i gefnogi'r ymgyrch hon.