Digwyddiadau Cymunedol

Clwb Beicio'r Barri

Cyflwynwyd y Clwb Beicio am y tro cyntaf yn ardal chwarae Tŷ Iolo, drwy’r rhaglen Cymunedau yn Gyntaf. Yn anffodus, daeth i ben yn 2020 oherwydd y pandemig.

Parhaodd y Tîm Cyfoethogi Cymunedau â'r bartneriaeth lwyddiannus gyda Pedal Power (sefydliad beiciau elusennol lleol yng Nghaerdydd), a llwyddodd swyddogion o'r elusen hyrwyddo a chynnal sesiynau beicio drwy gydol y gwanwyn a'r haf.

Cynhelir sesiynau Clwb Beicio bob dydd Mawrth rhwng 4.00pm a 5.30pm a chaiff plant ifanc rhwng 6-10 oed ddysgu beicio mewn amgylchedd diogel a chyfeillgar.

Mae peth o'r adborth a'r sylwadau gan y cyfranogwyr yn cynnwys:

• “Rwy’n gallu reidio beic nawr heb gymorth ac mae gen i fwy o hyder";
• “Roeddwn i mor hapus gyda menter y Clwb Beicio, gwnaeth fy mab elwa cymaint ohono, diolch o galon";
• “Mae fy mab a'm merch bellach yn gallu reidio beic heb gymorth ac maen nhw wedi magu hyder dros yr haf”.

Meddai Mark Ellis, Swyddog Cyfoethogi Cymunedau a Buddsoddi, "Mae hwn yn brosiect cymunedol mor wych i'w reoli. Mae gweld plant lleol yn defnyddio eu man agored lleol i ddysgu reidio beic yn anhygoel ac yn cysylltu â pholisi Newid Hinsawdd y cyngor.

Cynhaliwyd y picnic dathlu blynyddol ar ddydd Mawrth 1 Awst yn Crawshay Court, Llanilltud Fawr. Mae'r tai gwarchod yn gynllun ar gyfer pobl hŷn ac mae'n cael ei redeg gan Cartrefi’r Fro.

 

Mae'r prosiect yn ymwneud â gweithio mewn partneriaeth i gefnogi ein cymuned leol, yn enwedig gyda'r argyfwng costau byw presennol. Mae Cartrefi’r Fro mewn partneriaeth â’r swyddog cymorth cymunedol yr heddlu Rhiannon Cummings yn gallu rhoi cymorth a chyngor i denantiaid a gwirfoddolwyr wrth weithio ar y prosiect. 

 

Mae Cartrefi’r Fro yn arwain ar y prosiect cymunedol hwn gan weithio gyda phartneriaid gan gynnwys Vale Plus Extra, Plant Llantwit, Ogi a gwirfoddolwyr cymunedol lleol. Mae'r prosiect gardd yn Crawshay Court yn cynnwys tyfu ffrwythau a llysiau ar gyfer y tenantiaid ac aelodau o'r gymuned fel rhan o Brosiect Mynediad at Fwyd Llanilltud Fawr.

 

Cynhaliwyd y digwyddiad i gydnabod a diolch i'r holl wirfoddolwyr sydd wedi bod yn rhan o sefydlu a chynnal a chadw'r ardd. Cyflwynwyd tystysgrifau o ddiolch i wirfoddolwyr yn y digwyddiad.

 

Rhoddwyd y bwyd picnic yn garedig gan Ogi Cymru sydd wedi bod yn rhoi cymorth i'r prosiect drwy wirfoddoli yn yr ardd a chynorthwyo i ariannu’r gwaith o osod tŷ gwydr poteli plastig.

 

Mae Vale Plus Extra wedi bod yn rhagorol ac wedi gweithio'n ddiflino ar y prosiect i'w wneud yn gymaint o lwyddiant. Maent wedi cynaeafu pys, moron, ffa gwyrdd, ffa dringo, betys, tomatos, tatws, corbwmpenni, rhosmari, rhuddygl, letys, winwns, shibwns, pwmpenni ac mae'r cynnyrch yn parhau i ffynnu.

 

Mae'r holl gnydau a gynaeafwyd wedi cael eu defnyddio gan denantiaid Cynllun Tai Gwarchod Crawshay, aelodau o Vale Plus a gwirfoddolwyr cymunedol lleol a lluniwyd darlun hyfryd o'r ardd gymunedol a’i gyflwyno yn y digwyddiad i'w arddangos yn y lolfa gymunedol.

 

Dywedodd Mark Ellis, arweinydd gerddi cymunedol y tîm Cyfoethogi Cymunedau "Mae hwn wedi bod yn brosiect hirsefydlog ers cyn Covid ac mae'r gwaith sydd wedi mynd ymlaen gyda phartneriaid yn ystod yr ychydig flynyddoedd diwethaf wedi bod yn wych. Diolch yn fawr iawn i bawb a gymerodd ran am wneud i'r ardd edrych mor anhygoel a hardd. 

Cynhaliwyd garddwest yng Nghynllun Tai Gwarchod Crawshay i ddathlu'r prosiect pontio'r cenedlaethau llwyddiannus rhwng gwirfoddolwyr o Vale Plus Extra, tenantiaid o'r cynllun yn Llanilltud Fawr a phlant o Flwyddyn 5 Ysgol y Ddraig.

 

Mae'r gwirfoddolwyr wedi bod yn gweithio gyda Thîm Plismona Cymdogaethau Bro Morgannwg drwy gydol yr Haf a'r Hydref. 

 

Mae'r gwirfoddolwyr wedi gwneud gwaith gwych; plannu, dad-chwynnu, tacluso, dyfrio a gwneud celf a chrefftau ar gyfer yr ardd. Mae pawb wedi gweithio'n wych gyda'i gilydd ac wedi mwynhau plannu'r hadau a'u gwylio yn tyfu. Mae’r tenantiaid wedi gallu mynd â ffrwythau a llysiau gartref ac mae tenantiaid Cynllun Tai Gwarchod Crawshay wedi bod yn mwynhau cynnyrch yn eu digwyddiadau te prynhawn cymdeithasol wythnosol.

 

Nod y prosiect yw atal twyll fasnachwyr rhag targedu aelodau agored i niwed o'n cymuned trwy gynorthwyo tenantiaid a gweithredu fel gwarcheidwaid cymunedol, gan gadw llygad ar breswylwyr ardal Llanilltud Fawr.

 

 

Aeth Maer Llanilltud Fawr i’r digwyddiad a chyflwynodd dystysgrifau i'r gwirfoddolwyr sydd wedi gweithio mor galed i wneud y prosiect yn llwyddiant.  Dywedodd Sheralee Baldwin, cydlynydd y cynllun "Mae mor hyfryd gweld y gwirfoddolwyr yn dod bob wythnos ac yn gwneud gwahaniaeth mor enfawr i'r ardd. Rwy'n gwybod fy mod yn siarad ar ran yr holl denantiaid sydd wir yn gwerthfawrogi'r gwaith caled wedi’i wneud a'r ardd hardd y maen nhw'n edrych allan arni".

 

Diolch yn fawr i'r Big Fresh Catering Company a ddarparodd y bwffe anhygoel a fwynhawyd gan fwy na 80 o bobl a aeth i’r arddwest.

Gardd Pawb Yn Cynnal Digwyddiad Haf

Ar ôl tymor llwyddiannus o weithgareddau yng Ngardd Pawb, cynhaliodd Home Education Wales mewn partneriaeth â thîm Cyfoethogi Cymunedau Cartrefi’r Fro ddigwyddiad haf. Roedd y digwyddiad yn agored i bawb a chroesawodd denantiaid a thrigolion o'r ardal leol.

 

Cafodd Gardd Pawb ei haddurno gyda baneri bach a chafodd pawb gyfle i weld y man agored. Mae'r ardd, diolch i gefnogaeth Home Education Wales a phartneriaid eraill, yn cynnig lle i bobl gymryd rhan mewn gweithgareddau awyr agored. Dros yr haf, mae tŷ gwydr poteli dŵr wedi'i osod ynghyd â mainc ddigidol a chegin fwd.

 

Roedd y gweithgareddau hwyliog ar y diwrnod yn cynnwys y beic paent poblogaidd lle mae plant ac oedolion yn mynd ar gefn beic statig gan greu lluniau hyfryd trwy fwrdd troi sy’n cylchdroi. Hefyd cymerodd plant ac oedolion ran mewn rasys hwyaid a helfa sborion, ynghyd â phaentio wynebau a gwnaeth dewin ddiddanu gan fodelu balwnau a oedd yn ffefryn ymysg pawb.

 

Cafodd byrgyrs a chŵn poeth eu darparu gan Home Education Wales a chafodd lluniaeth a lolïau iâ eu darparu gan Cartrefi’r Fro. Daeth llawer o bobl i’r digwyddiad diolch i’r tywydd poeth a’r awyr las.

 

Dywedodd Donna Rapley, ymddiriedolwr Home Education Wales a threfnydd y digwyddiad "Roedd yn hyfryd gweld yr ardd yn cynnal digwyddiad gwych fel hyn yn ystod gwyliau'r haf a gweld pawb yn mynychu yn cael amser mor dda ac yn mwynhau'r ardd gymunedol".

 

Rhaid diolch yn arbennig i'r holl wirfoddolwyr a helpodd yn yr heulwen gan helpu i sicrhau bod yr ardd gymunedol yn edrych yn wych. Roedd yn wych gweld cymaint o blant a theuluoedd newydd yn dod i'r digwyddiad.

 

Diolch yn fawr hefyd i Gyngor Bro Morgannwg am ariannu'r digwyddiad drwy'r rhaglen ariannu digwyddiadau cymunedol.

 

Os hoffech chi gymryd rhan yn y prosiect hwn, cysylltwch â Mark Ellis, Swyddog Cyfranogiad a Chyfoethogi Cymunedau Cyngor Bro Morgannwg, ar markellis@valeofglamorgan.gov.uk