Dydd Gwener – Cwrdd â'r bobl tu ôl i'r prosiectau

Prosiect Sero

Helen Moses, Rheolwr Strategaeth a Phartneriaeth

Gweithiodd Helen a'r tîm Strategaeth a Phartneriaethau yn agos gyda chydweithwyr ar draws y Cyngor i ddatblygu'r Cynllun Her Hinsawdd yn 2021 a dod ag ystod o waith at ei gilydd fel rhan o Brosiect Sero.

Mae Helen wedi bod yn awyddus i sicrhau y gwneir cysylltiadau â Phrosiect Sero ar bob cyfle a bod yr angen i ymateb i'r argyfwng hinsawdd yn cael ei amlygu drwy weithgareddau'r Cyngor a'n gwaith ni drwy'r Bwrdd Gwasanaethau Cyhoeddus. 

Yn 2021 sefydlwyd Bwrdd Prosiect Sero newydd, wedi'i gadeirio gan y Prif Weithredwr ac yn dod ag uwch swyddogion â chyfrifoldeb am y 18 her o fewn y Cynllun Her Hinsawdd ynghyd.

Mae Helen wedi cefnogi gwaith y Bwrdd gan gynnwys cyflwyno adroddiadau cynnydd rheolaidd i'r Cabinet a’r Pwyllgor Chraffu a bu hefyd yn gweithio'n agos gyda'r tîm Cyfathrebu a'r Gwasanaeth Ieuenctid i ymgysylltu â'n trigolion.

Mae Helen yn falch o groesawu Susannah McWilliam i'r tîm Strategaeth a Phartneriaethau a fydd, fel Rheolwr Rhaglen newydd y Prosiect Sero, nawr yn gweithio gyda’r Bwrdd Prosiect Sero a chydweithwyr y Cyngor i gyflawni Prosiect Sero. 

Susannah McWilliam – Project Zero Officer

Ymunodd Susannah â'r Cyngor yn ddiweddar fel Rheolwr y Rhaglen Prosiect Sero. Mae hi'n edrych ymlaen at weithio gyda’r Bwrdd Prosiect Sero a chyda thimau ar draws y Cyngor y mae eu cynlluniau gwaith yn cyfrannu at gyflawni'r ymrwymiadau yn y Cynllun Her Newid yn yr Hinsawdd.

Mae Susannah yn dod â blynyddoedd o brofiad rheoli prosiectau cynaliadwy ledled y DU o'r sector elusennau. Mae hi hefyd yn Ymddiriedolwr ar sefydliad amgylcheddol lleol ym Mhenarth, ac yn cadeirio'r grŵp Penarth Di-blastig.

Bwyd Y Fro

Joanna Beynon, Swyddog Polisi

Mae Jo yn cefnogi prosiect Bwyd y Fro ar ran y Cyngor, gan eistedd ar ei Grŵp Llywio. Mae Jo yn sicrhau bod cysylltiadau'n cael eu gwneud rhwng y Cyngor a gwaith y Bwrdd Gwasanaethau Cyhoeddus ar Fwyd y Fro, er mwyn sicrhau bod ein hymdrechion yn cael yr effaith fwyaf posibl ac osgoi dyblygu. Mae hyn yn cynnwys sicrhau bod grantiau tlodi bwyd Llywodraeth Cymru yn cael eu gwario'n dda ar brosiectau fydd o fudd i gynifer o drigolion y Fro â phosib.

Mae Jo yn cydweithio'n agos â Louise Denham fel un o gynrychiolwyr allweddol y Cyngor ar Brosiect Bwyd Llanilltud, sy'n brosiect aml-bartner a thraws-sector dan arweiniad Bwyd y Fro i helpu i wella mynediad at fwyd yn Llanilltud Fawr. Yn ddiweddar, mae Prosiect Bwyd Llanilltud wedi lansio'r 'Ganolfan Bwyd a Mwy' i helpu pobl i gael mynediad at gymorth ar faterion ehangach sy'n aml yn gysylltiedig â thlodi bwyd. Mae digon o gamau gweithredu eraill ar restr y prosiect, ond efallai mai'r un mwyaf perthnasol ar gyfer wythnos yr hinsawdd yw y bydd yn cefnogi gerddi cymunedol lleol yn Llanilltud Fawr er mwyn helpu i annog pobl i dyfu eu bwyd eu hunain.  Y gobaith yw y bydd y gwaith yn helpu mwy o bobl i gael bwyd da, lleihau gwastraff bwyd, siopa'n lleol ac annog pobl i dyfu eu bwyd eu hunain.

Teithio Cynaliadwy

Lisa Elliott, Swyddog Teithio Llesol

Lisa Elliott, Swyddog Teithio Llesol

Mae Lisa wedi gweithio i Gyngor Bro Morgannwg ers 7 mlynedd. Ar ôl gweithio i'r Lluoedd Wrth Gefn am 20 mlynedd ym maes Cyllid ac Adnoddau Dynol, roedd hi'n teimlo ei bod angen newid cyfeiriad ac roedd swydd wag o fewn tîm Trafnidiaeth Gymunedol Greenlinks yn gyfle am newid roedd hi'n chwilio amdano.

Cafodd Lisa ei phenodi'n Swyddog Teithio Llesol ym mis Awst 2020.

Mae ei rôl yn cefnogi’r ymgyrch tuag at ddod yn garbon niwtral mewn sawl ffordd, fel:

• Datblygu ac adeiladu prosiectau seilwaith i ddarparu llwybrau beicio/cerdded i gyrchfannau allweddol
• Gweithio gydag ysgolion ar eu cynlluniau teithio llesol a darparu adnoddau i'w galluogi i gerdded, mynd ar sgwter neu feicio i'r ysgol
• Hyrwyddo Siarter Teithio Iach y Fro i gael staff i ddefnyddio dulliau teithio llesol i’w gweithle

Mae'r cyfan yn ymwneud â newid ymddygiad a bydd trosglwyddo’r neges i'n trigolion y bydd dewis cerdded neu fynd â'r bws i'r ysgol, i’r gwaith neu i siopa yn gwneud gwahaniaeth i'n hamgylchedd.

Yn ystod cyfnod Covid roedd gymaint o bobl yn mwynhau beicio o gwmpas eu trefi gan nad oedd ceir yno - byddai'n wych os gallen ni efelychu hynny nawr!

Seilwaith Gwyrdd

Marcus Bayona-Martinez, Uwch Gynllunydd

Dechreuodd Marcus ei rôl fel uwch gynllunydd ym mis Ionawr eleni a chymerodd dros y gwaith ar y Cynllun Seilwaith Gwyrdd yr oedd ei dîm wedi’i ddechrau. Dros y misoedd nesaf bydd yn coladu’r wybodaeth a gasglwyd i gwblhau adran archwilio'r cynllun. Gobaith Marcus yw cynnal ymarfer ymgysylltu â'r cyhoedd i wella'r wybodaeth a gasglwyd ymhellach ar fannau gwyrdd a dechrau sgyrsiau am syniadau ar gyfer y dyfodol.

Mae’r cynllun seilwaith gwyrdd yn rhan annatod o ymateb y Cyngor i'r argyfwng hinsawdd ac mae'n darparu cyfle gwirioneddol i arddangos sut mae ein hagwedd yn newid. Yn uniongyrchol, o ran cynorthwyo i gyflawni allyriadau sero-net, ond hefyd yn anuniongyrchol drwy hyrwyddo pwysigrwydd yr amgylchedd naturiol a sut rydym yn rhyngweithio ag ef.