Staffnet+ >
Yr Wythnos Gyda Rob 02 Chwefror 2024
Yr Wythnos Gyda Rob
02 Chwefror 2024
Annwyl gydweithwyr,
Hoffwn ddechrau'r wythnos hon drwy fynd i'r afael â'r sylw syfrdanol sydd wedi’i roi yn y cyfryngau i faterion sy'n gysylltiedig â rhai o'n hysgolion yn y Barri yn ddiweddar.
Rwy'n gwybod yn iawn bod gweithio mewn ysgol yn gallu bod yn heriol a bod angen gwahanol fathau o gymorth ar rai o'r plant a'r bobl ifanc er mwyn iddynt allu ymgysylltu ag addysg a pharatoi ar gyfer bywyd ar ôl ysgol. Fodd bynnag, gwn hefyd fod ein hysgolion yn amgylcheddau diogel a chefnogol lle mae ein cydweithwyr yn gweithio'n eithriadol o galed o ddydd i ddydd i helpu ein disgyblion i gyflawni.
Yn sicr, nid wyf yn cydnabod y darlun y mae rhai wedi ceisio ei gyfleu o'n hysgolion a'r disgyblion sy'n eu mynychu. Mae ein hysgolion yn rym er daioni yn ein cymunedau. Mae bywyd pob disgybl yn cael ei gyfoethogi drwy fynychu ac mae safon y gefnogaeth addysgol a bugeiliol a gynigir o'r radd flaenaf.
Mae ein staff ysgol yn rhyngweithio â disgyblion bob dydd a gwn mai eu prif flaenoriaeth yw lles eu disgyblion bob amser. Efallai mai'r ffordd orau y gallaf ddangos hyn yw drwy rannu adborth a roddwyd i mi yr wythnos hon gan riant y mae ei blentyn wedi bod yn derbyn rhywfaint o gymorth ychwanegol. Rwyf wedi ei olygu rhywfaint er mwyn osgoi rhannu unrhyw fanylion personol, ond mae effaith gwaith ein staff ysgol yn dal yn glir i'w gweld.
“Rydych chi'n newid bywydau. Mae'n swnio'n ddramatig ond nid ydyw. Mae'r newid yn fy mhlentyn a'r teulu hwn yn syfrdanol. Yn gyntaf, mae gen i blentyn sydd yn gyffredinol eisiau mynd i'r ysgol! Roeddwn i'n dechrau amau a fyddwn i'n gweld hynny eto. Ac sydd wir yn ymgysylltu â staff a phlant eraill a hyd yn oed yn gwneud rhywfaint o waith ysgol!!
"Mae gen i blentyn sydd y rhan fwyaf o'r amser yn ddigynnwrf ac yn hapus hefyd. Ac mae e’n cymryd rhan mewn sgyrsiau am yr ysgol ac yn bwysicach fyth, am ei emosiynau a'i ymddygiad. Rwy'n gwybod bod gennym dipyn o ffordd i fynd o hyd, ond ychydig fisoedd yn ôl byddai wedi bod yn amhosibl cael yr ymgysylltiad hwn.
"Mae ein teulu cyfan yn fwy digynnwrf, mae fy mhlentyn arall yn hapus ac maen nhw'n dod ymlaen yn well. Ac rydw i'n berson gwahanol! Rwy'n gwybod y byddwn yn wynebu cyfnodau da ac anodd. Ond am y tro, mae’n anodd cyfleu cymaint rydw i’n rhyfeddu ar y cynnydd a wnaed. Diolch i chi i gyd o waelod fy nghalon."
Mae'r adborth hwn yn dangos na ddylem fyth golli golwg ar y bobl rydym yn gweithio i'w cefnogi a'r effaith y mae ein gwaith yn ei chael ar eu bywydau. Hoffwn ddiolch i’n holl staff ysgol am eu gwaith ac am barhau i godi uwchlaw'r sgwrsio ar-lein a rhoi disgyblion yn gyntaf. Diolch yn fawr, bawb. Rydych chi'n newid bywydau.
Mewn enghraifft arall o'n timau'n ceisio cefnogi plant a phobl ifanc, cymerodd nifer o gydweithwyr ran mewn Digwyddiad Matrics Rhaglen Trawsnewid ac Integreiddio’r Blynyddoedd Cynnar llwyddiannus iawn yng Nghaerdydd ddydd Mercher.
Wedi'i ddatblygu a'i arwain i raddau helaeth gan ein timau yn y Fro, daeth y digwyddiad ag ymarferwyr o bob rhan o Gaerdydd a'r Fro ynghyd i adolygu'r gwaith sydd wedi’i wneud hyd yma ar y rhaglen Braenaru. Trwy gydol y dydd buont yn gweithio i asesu perfformiad ein gwasanaethau blynyddoedd cynnar a nodi sut y gallem ddarparu dull mwy cydlynol o ddarparu cymorth i blant ifanc a theuluoedd.
Hoffwn ddiolch i bawb a gynrychiolodd y Fro yn y digwyddiad ac yn arbennig i Emma Ford, ein Rheolwr Prosiect Braenaru’r Blynyddoedd Cynnar, a drefnodd bob agwedd ar y digwyddiad o'n hochr ni. Mae'n faes hanfodol bwysig o'n gwaith a bydd eich mewnbwn yn gwneud gwahaniaeth gwirioneddol wrth benderfynu’r camau nesaf ar gyfer datblygiad rhanbarthol Gwasanaethau’r Blynyddoedd Cynnar.
Bydd cynllunio integredig yn agwedd allweddol ar gam nesaf rhaglen drawsnewid ein Gwasanaethau Ail-lunio. Ar ôl i rai o'i gydweithwyr ymuno â’r UDA yr wythnos diwethaf fel rhan o'r cynllunio ar gyfer y gwaith hwn, roedd yn braf iawn gweld Derek Walker, Comisiynydd Cenedlaethau'r Dyfodol newydd, yn cyfeirio at ein gwaith yn ei gylchlythyr diweddaraf.
Soniodd y Comisiynydd am sut mae’r Fro "yn cynnal ei gwaith parhaus i newid y ffordd y caiff gwasanaethau eu darparu, gan sicrhau ei bod yn gweithredu mor effeithlon â phosibl, tra hefyd yn ymchwilio i'r ffyrdd creadigol o wasanaethu ein trigolion orau." Mae hwn yn grynodeb taclus iawn o'r hyn yr ydym yn gweithio i'w gyflawni ac mae ei weld yn cael ei gydnabod yn genedlaethol yn ein hatgoffa bod Tîm y Fro unwaith eto ar flaen y gad o ran newid yn y sector cyhoeddus.
Mae gweithio gyda'r gymuned i ddarparu gwasanaethau yn un o'r ffyrdd yr ydym eisoes wedi bod yn llwyddiannus wrth newid sut rydym yn gweithio. Ar ôl trafod y gwasanaeth ardderchog a ddarparwyd gan ein llyfrgelloedd yn fy neges yr wythnos diwethaf, roeddwn yn falch iawn o glywed gan un arall o dîm y llyfrgelloedd, Paul Gauci, sydd wedi bod yn gwneud gwaith gwych i gefnogi llyfrgelloedd cymunedol y Fro. Mae'r llyfrgelloedd cymunedol yn cael eu cynnal gan wirfoddolwyr a'u cefnogi gan y Cyngor, ac mae'r llyfrgelloedd cymunedol yn enghraifft wych o drawsnewid.
Rhannodd Phil rywfaint o wybodaeth gyda mi am grŵp celf a sefydlodd gydag un o'r gwirfoddolwyr yn Llyfrgell Gymunedol Dinas Powys. Arweiniodd y prosiect at sefydlu mannau arddangos yn llyfrgelloedd Dinas Powys a'r Rhws. Mae'r arddangosfa ddiweddaraf mewn cyfres ohonynt, gan artist ifanc Euan Balman y tro hwn, sy’n dwyn yr enw BUG, yn agor heddiw. Roedd yn wych clywed mwy am gyfleuster sydd wrth wraidd y gymuned a byddwn yn argymell i unrhyw un sydd gerllaw’r llyfrgell fanteisio ar y cyfle i alw heibio a chymryd golwg. Diolch unwaith eto Phil am rannu hyn gyda mi a diolch i'r holl wirfoddolwyr a staff peripatetig sy'n gwneud y llyfrgelloedd cymunedol yn gymaint o lwyddiant.
Yn olaf, Mis Hanes LHDTC+ yw mis Chwefror ac fel bob amser byddwn yn cefnogi ac yn dathlu hyn ar draws y Cyngor. Mae cydnabod y mis yn un o'r ffyrdd yr ydym ni fel Cyngor yn dangos ein bod wedi ymrwymo i ddeall, parchu a dathlu amrywiaeth y gymuned LHDT+. Thema eleni yw meddygaeth - #ODanYMeicrosgop. Mae hyn yn gydnabyddiaeth o gyfraniadau'r gymuned LHDT+ at faes meddygaeth. Bydd hefyd yn tynnu sylw at brofiad y gymuned LHDT+ wrth dderbyn triniaeth gofal iechyd. Gallwch ddarganfod mwy am yr hyn sy’n digwydd ar draws y Cyngor ar StaffNet ac os hoffech wybod sut i gymryd rhan, cysylltwch â’r rhwydwaith GLAM.
Fel bob amser, diolch am eich gwaith yr wythnos hon. Diolch yn fawr, bawb.
Rob.