Yr Wythnos Gyda Rob

17 Chwefror 2023

Annwyl gydweithwyr, 

Un o'r meysydd gwaith yr wyf fwyaf balch ohono yw’r camau breision rydym wedi'u cymryd yn ystod y blynyddoedd diwethaf i fod yn Gyngor, ac yn gyflogwr, sy'n sicrhau cynwysoldeb, amrywiaeth, a chydraddoldeb sy'n rhedeg drwy bopeth a wnawn. Rwy'n falch o bopeth rydyn ni'n ei wneud i ddathlu'r bobl sy'n rhan o'n Cyngor ac felly rwy'n falch iawn o allu rhannu bod y Fro yn cynnal digwyddiad i ddathlu Diwrnod Rhyngwladol y Menywod ar 8 Mawrth.

Mae DRhM yn ddiwrnod rhyngwladol sy’n dathlu llwyddiant cymdeithasol, economaidd, a diwylliannol menywod. Mae’r diwrnod hefyd yn alwad i gyflymu ymgeision at gydraddoldeb i fenywod.  Y thema eleni yw #EmbraceEquity a dyna fydd ein digwyddiad ni’n ei wneud. Rydym yn falch iawn y bydd nifer o fenywod llwyddiannus yn siarad yn y digwyddiad, gan gynnwys Heather Stevens CBE, Cadeirydd Ymddiriedolwyr y Waterloo Foundation, a Kellie Beirne, Cyfarwyddwr Bargen Ddinesig Prifddinas-Ranbarth Caerdydd. Mae cost lawn y digwyddiad yn cael ei thalu gan ein noddwyr hael, y Waterloo Foundation, ISG, a CJCH Solicitors.

Mae nifer o lefydd yn y digwyddiad wedi'u cadw ar gyfer menywod sy'n gweithio i'r Cyngor ac os hoffech chi ddod, anfonwch e-bost at Leader@valeofglamorgan.gov.uk. Mae manylion llawn y digwyddiad bellach ar StaffNet+.

Ers cael ei ailagor gan y Cyngor yn 2021 mae'r Pafiliwn unwaith eto yn lleoliad sydd wrth galon y gymuned. Tanlinellwyd hyn yr wythnos hon gyda lansiad preswylfa blwyddyn o hyd gan Goleg Brenhinol Cerdd a Drama Cymru.

Soniais yn gyflym yr wythnos diwethaf y bydd y peilot yn gweld y coleg yn cynnal sesiynau cerddoriaeth rhieni a phlant bach, yn sefydlu ensemble bach yn y pafiliwn ac yn rhoi cyngherddau i'r gymuned leol. Mae CBCDC wedi meithrin enw da rhyngwladol fel canolfan o ragoriaeth artistig, gan helpu oedolion ifanc i fireinio eu sgiliau ar draws y celfyddydau perfformio a diwydiannau cysylltiedig. Mae eu presenoldeb yn y Pafiliwn yn dod yn sgil yr Ŵyl Gerddoriaeth Siambr lwyddiannus a gynhaliwyd y llynedd. Canmolodd cyfarwyddwyr yr ŵyl weledigaeth y Cyngor ar gyfer y lleoliad gan argymell ein tîm i'r coleg.  Mae'r breswylfa ddilynol yn dangos y parch y mae'r lleoliad wedi’i feithrin, a hoffwn gydnabod gwaith caled Phil Southard a gweddill y tîm wrth ddod â'r bartneriaeth hon at ei gilydd.

Mae cefnogi plant, pobl ifanc, a'u teuluoedd yn rhan hanfodol o'n gwaith.  Roedd yn wych gweld y Dirprwy Weinidog Gwasanaethau Cymdeithasol a'r Gweinidog Cyfiawnder Cymdeithasol, Jane Hutt, yn ymweld â'n tîm Dechrau'n Deg ddydd Llun i weld y gwaith gwych sy'n cael ei wneud drwy’r sesiynau Nibble & Natter. Yn y sesiynau hyn mae ein tîm Dechrau'n Deg amlasiantaethol yn gweithio gyda'i gilydd i ddangos i deuluoedd sut i wella iaith a chyfathrebu drwy arferion bob dydd. Mae'r adborth gan y rhai sy'n cymryd rhan bob amser yn gadarnhaol iawn a hoffwn ddiolch i Anna Pitcairn-Knowles, Lowrhi Thomas, Abi John a Claire Gamble am wneud hyn yn llwyddiant, sydd bellach yn cael ei gydnabod gan Lywodraeth Cymru. Gallwch weld Rheolwr Dechrau'n Deg, Kathryn Clarke yn siarad am effaith y gwaith ar ein sianeli cyfryngau cymdeithasol.

Daeth enghraifft wych arall o'r maes gwaith hwn i’m sylw yr wythnos hon. Ar 10 Chwefror cynhaliodd y Tîm Cymunedau am Waith ddigwyddiad i arddangos popeth sydd ar gael i bobl ifanc o ran cyflogaeth, addysg, gwirfoddoli a chymorth iechyd a lles drwy'r Cyngor a'n partneriaid. Daeth 51 o sefydliadau gwahanol i Ganolfan Gelfyddydau’r Memo ar gyfer y digwyddiad, a oedd yn cynnwys sesiynau cyflwyno gan Goleg Caerdydd a'r Fro yn ogystal â gweithdai a ddarparwyd gan gynhyrchwyr teledu a ffilm a Sefydliad Clwb Pêl-droed Dinas Caerdydd. Daeth bron i 300 o bobl ifanc i'r digwyddiad ac rwy'n siŵr y byddant wedi gadael yn fwy ymwybodol o'u hopsiynau ac mewn sefyllfa well i ddewis y llwybr cywir iddyn nhw. Diolch yn fawr i'r tîm Cymunedau am Waith cyfan a weithiodd yn galed i sicrhau bod y digwyddiad yn rhedeg yn llyfn, ac yn arbennig i Angelina Patrick a helpodd i drefnu'r digwyddiad a sicrhau bod cyflogwyr yn bresennol.

Nodyn i'ch atgoffa'n gyflym ein bod yn agosáu at y dyddiad cau ar gyfer y Cynllun Prynu Gwyliau Blynyddol. Mae’r cynllun yn cynnig cyfle i staff brynu naill ai un neu ddwy wythnos ychwanegol o wyliau blynyddol (pro-rata i'r rhai sy'n gweithio'n rhan amser). Ailagorodd ceisiadau ar ddechrau'r flwyddyn a'r dyddiad cau yw Dydd Gwener 3 Mawrth.

Yn olaf, llongyfarchiadau i Naomi Meredith a fydd yn cynrychioli'r Cyngor ym mhalas Buckingham ym mis Mai. Bob blwyddyn mae'r Cyngor yn anfon cynrychiolydd i'r Royal Garden Party. Mae’r digwyddiad eleni ar gyfer y rhai sydd wedi gwneud cyfraniad arbennig drwy eu gwaith gydag oedolion ifanc, cymunedau, amrywiaeth, neu gynaliadwyedd. Tynnwyd enw Naomi allan o het a oedd yn llawn enwau eraill a enwebwyd gan yr Arweinydd a'r Dirprwy Arweinydd ddoe. Llongyfarchiadau Naomi. Gobeithio y cei di ddiwrnod i’r brenin. 

Diolch fel bob amser i bawb am eu gwaith caled yr wythnos hon. Diolch yn fawr bawb.

Rob.