Gwasanaethau Cymdeithasol yn derbyn adroddiad arolygu gwych

06 Ebrill 2023

Mae'r Tîm Gwasanaethau Cymdeithasol wedi derbyn adroddiad gwych yn dilyn arolygiad diweddar gan Arolygiaeth Gofal Cymru (AGC).

Asesodd AGC y Gwasanaethau Plant a Phobl Ifanc a’r Gwasanaethau Oedolion a chydnabod y lefel uchel y mae'r ddau'n gweithredu arni.

Mae eu hadroddiad yn tynnu sylw at uwch arweinyddiaeth gref o fewn yr adran a'r cynlluniau strategol clir sydd ar waith i werthuso gwelliannau.

Mae cydweithwyr hefyd am cael eu canmol yn sgil tystiolaeth glir o welliant ers i AGC gynnal gwiriad sicrwydd ym mis Tachwedd 2021, gan arwain at ganlyniadau gwell i blant, pobl ifanc a'u teuluoedd.

Nodwyd hefyd bod y rhan fwyaf o bobl yn derbyn cefnogaeth a gwasanaethau’n brydlon, ac roedd sylwadau cadarnhaol eraill yn ffocysu ar y gefnogaeth a ddarperir i gynnal diogelwch a lles defnyddwyr gwasanaethau a'r ymdrechion a wneir i sicrhau bod eu lleisiau'n cael eu clywed.

Daeth arolygwyr o hyd i dystiolaeth bod cyfathrebu yn Gymraeg ac ieithoedd eraill yn cael ei gynnig a chyfeirio at y buddsoddiad sy'n cael ei wneud mewn sicrhau ansawdd, gyda swyddi newydd fydd yn canolbwyntio ar y maes hwn.

Dywedodd Lance Carver, Cyfarwyddwr Gwasanaethau Cymdeithasol: "Rydym yn falch iawn o ganlyniadau'r adroddiad arolygu, sy'n hynod gadarnhaol.

"Yn anad dim, mae'r ddogfen yn gymeradwyaeth glir i'n staff ymroddedig, sydd wedi parhau i berfformio at safonau eithriadol ar adeg heriol o ddarparu Gofal Cymdeithasol ledled Cymru.

"Maen nhw wedi gweithio'n ddiwyd, yn aml yn gwbl anhunanol, yn erbyn cefndir o bwysau mawr ar adnoddau a mwy o alw, gan barhau i gynnig cymorth o'r radd flaenaf i rai o drigolion mwyaf agored i niwed y Fro.

"Mae pawb fu ynghlwm â hyn yn haeddu clod aruthrol am eu hymdrechion a hoffwn ddiolch yn bersonol i bob un ohonoch chi. Mae'r gydnabyddiaeth hon yn gwbl haeddiannol.

"Bydd y buddsoddiad i atgyfnerthu ein System Sicrhau Ansawdd yn cryfhau'r Gwasanaeth ymhellach, gan helpu i gynnig mwy fyth i'r rhai yn y Fro sydd ei angen fwyaf."