Gwirfoddoli o fudd i fwy na phrosiectau yn unig

Mae gwirfoddoli nid yn unig o fudd i lu o brosiectau gwerth chweil - gall hefyd fod yn brofiad sy’n rhoi boddhad mawr i'r bobl hynny sy'n rhoi o'u hamser.

Yr wythnos ddiwethaf, lansiodd y Cyngor ei Gynllun Gwirfoddoli i Weithwyr, sy'n cynnig cyfle i staff ymrwymo un diwrnod y flwyddyn i achos o'u dewis, ar yr amod ei fod yn gwella'r ardal leol.

Mae gwirfoddoli yn ffordd o helpu i hybu lles pobl mewn lleoliad penodol a chymdeithas yn gyffredinol.

Gall gynnig cyfle i ddysgu sgiliau newydd neu ddatblygu rhai sy'n bodoli eisoes a rhoi cipolwg ar yr heriau sy'n wynebu rhai aelodau o'r gymuned.

Mae Lianne Young o'r Tîm Rheoli Tai wedi gweithio gyda gwirfoddolwyr ar y cynllun Cyfeillion Digidol, menter a lansiwyd gan Wasanaeth Cartrefi’r Fro y Cyngor, i helpu pobl i oresgyn rhwystrau i fynd ar-lein.

Gweithiodd un gwirfoddolwr a oedd am aros yn ddienw ar y cynllun hwnnw a chael boddhad mawr o'r gwahaniaeth yr oeddent yn ei wneud.

“Cyn i mi ddechrau gwirfoddoli, roedd bywyd yn brysur iawn gyda llawer o ymrwymiadau gwahanol, ond wrth i'r plant ddechrau tyfu i fyny, gwelais fod bywyd yn dechrau mynd yn ddiflas ac yn unig,” dywedasant.

“Roeddwn wedi cwblhau llawer o ailhyfforddiant o fewn TG fel yr oedd yn cael ei alw bryd hynny, ac yna fel tiwtor oedolion i geisio cael gwaith.

“Mae gwirfoddoli wedi fy atgoffa bod fy ymennydd yn gweithio, mae wedi caniatáu i mi gadw’n brysur.  Rwy'n amsugno gwybodaeth yn hawdd ac yn hoffi trosglwyddo'r hyn rwyf wedi'i ddysgu i eraill, i ddangos, gobeithio, y gall unrhyw un roi cynnig arni a dysgu rhywbeth newydd waeth beth fo'ch amgylchiadau.

"Mae wedi fy ngalluogi i gadw fy sgiliau digidol yn effro.

“Gallai gwirfoddoli chwarae rhan hanfodol yn nhaith  rhywun yn ôl i’r gwaith a'u helpu i fod yn llai ynysig yn gymdeithasol. Mae'n wych ar gyfer sefydlu trefn ac yn eich helpu i deimlo eich bod yn cael eich gwerthfawrogi.”

Mae Lianne hefyd yn gweithio gyda gwirfoddolwyr o fewn cynlluniau tai gwarchod y Cyngor.

Maent wedi helpu gydag amrywiaeth o fentrau fel rhan o Gwerth yn y Fro, prosiect a ariennir gan Fwrdd Iechyd Prifysgol Caerdydd a'r Fro a Llywodraeth Cymru, a ddarperir hefyd gan Gartrefi’r Fro.

Mae hynny'n rhoi cyfle i bobl ennill gwobrau am roi o'u hamser. Gall y rhain gael eu defnyddio gan yr unigolyn neu eu rhoi i eraill a'u cyfnewid am amrywiaeth o gynnyrch a gwasanaethau gwahanol mewn busnesau ar draws y Sir.

Hyd yn hyn, mae cynrychiolwyr o'r grŵp hwn wedi gweithio ar gyfres o brosiectau, gan gynnwys gardd yn Fairoaks yn Ninas Powys, Crawshay Court yn Llanilltud Fawr a'r Pod Bwyd sydd wedi'i leoli ar Ystâd St Lukes, Penarth.

Dylai unrhyw aelod o staff sy'n dymuno cymryd rhan yn y Cynllun Gwirfoddoli i Weithwyr drafod y mater gyda'u rheolwr.

Gallant wedyn ofyn am ddiwrnod gwirfoddoli trwy Oracle, yn yr un modd ag y mae gwyliau blynyddol yn cael ei drefnu.

Mae nifer o ffyrdd y gellir treulio'r diwrnodau.

Gall staff wneud eu trefniadau eu hunain os ydynt eisoes yn ymwybodol o achos neu elusen a fyddai'n elwa o'u hamser.

Fel arall, mae cyfleoedd sy'n cyd-fynd orau â diddordebau penodol i’w canfod trwy e-bostio Gwerth yn y Fro neu Lianne Young.

Gall cydweithwyr hefyd gymryd rhan mewn un o bedwar digwyddiad ar raddfa fawr y flwyddyn sy'n cyd-fynd ag amcanion yng Nghynllun Cyflawni Blynyddol y Cyngor, gan gynnwys Prosiect Sero a'r argyfwng costau byw.