Yr Wythnos Gyda Rob

27 Hydref 2023

Annwyl gydweithwyr,

Yr wythnos hon rydw i wedi bod yn ddigon ffodus i wneud dwy o fy hoff rannau o'm swydd mewn olyniaeth fer - dathlu llwyddiant rhai o'n haelodau staff sydd wedi bod mewn swydd hiraf a chroesawu cydweithwyr newydd i'r Fro.

Brynhawn Mawrth roeddwn i yn ein sesiwn Gwobrwyo Gwasanaeth Hir ddiweddaraf. Roedd y sesiwn dydd Mawrth yn un o’r rhai gorau hyd yn hyn o ran presenoldeb, gyda grŵp o gydweithwyr o bob rhan o'r sefydliad yn ymuno â'r Arweinydd a minnau am daith i’r gorffennol, a'r cwis cerddoriaeth enwog.

Yn dilyn adborth gan staff, gwnaethom symud amseriad y sesiwn i fod yn ddiweddarach yn y prynhawn. Mae hyn yn ei gwneud hi'n llawer haws i'r cydweithwyr hynny sy'n gweithio yn ein hysgolion ymuno â ni ac roedd yn wych cwrdd ag ystod ehangach fyth o staff. Cysylltodd aelod o staff ysgol, Domini o Ysgol Gynradd Rhws, â'n tîm AD yn dilyn y digwyddiad i ddweud ei bod wedi cael amser hyfryd. Gwych clywed hynny Domini a diolch yn fawr i bawb a gymerodd amser i fynychu. Mae bob amser yn bleser clywed straeon pobl, i gydnabod cyflawniadau ac ymroddiad ein cydweithwyr i wasanaeth cyhoeddus. Treulir llawer o'r sesiwn yn siarad am amseroedd ac adegau cofiadwy. Mae'n dweud cymaint am ein staff bod y rhain yn ddieithriad yn atgofion o helpu trigolion, cefnogi eraill, a theimladau o wneud gwahaniaeth. Wel, y rhai nad ydyn nhw’n ymwneud â'r hen far staff o leiaf!

Roedd dau o'r rheini yno brynhawn Mawrth, Dawn Bowen a Lynis Hessey, yn dathlu 40 mlynedd anhygoel o wasanaeth gyda'r Cyngor. Camp yn wir. Roedd yn arbennig o braf cael cyfle i ddal i fyny gyda Dawn a oedd yn un o'r bobl gyntaf i mi gyfarfod pan ymunais â'r Fro ym 1996 fel aelod newydd yn yr Adran Gynllunio ar y pryd. Fel aelod newydd o staff, rhoddodd hi groeso mawr i mi ac rwy’n gwybod ei bod wedi bod yn gymorth amhrisiadwy i'r tîm Cynllunio drwy gydol ei hamser yma.

Fore Iau roedd hi'n bryd croesawu cydweithwyr newydd i'r sefydliad yn ein sesiwn Croeso i'r Fro ddiweddaraf. Roedd 27 o ddechreuwyr newydd yn bresennol ac roedd y sgyrsiau drwy gydol y bore yn canolbwyntio ar ddiwylliant, newid a datblygiad.

Ymhlith y wynebau newydd roedd Nicki Johns, ein Pennaeth Digidol newydd. Bydd Nicki yn arwain y gwaith o gyflawni'r Strategaeth Ddigidol y mae cydweithwyr ar draws y sefydliad wedi helpu i'w llunio dros y flwyddyn ddiwethaf. Rwy'n siŵr y bydd Nicki yn cyflwyno ei hun i lawer ohonoch dros yr wythnosau a'r misoedd nesaf ac rwy’n gwybod y byddai'n croesawu unrhyw feddyliau sydd gennych ar sut i'n gwthio ymlaen ar ein taith ddigidol.

Soniais yr wythnos diwethaf fod y Cyngor yn gwneud nifer o bethau i nodi Mis Hanes Pobl Dduon. Ddydd Mercher cafodd ein rhwydwaith Amrywiol eu cyfarfod cyntaf gyda grŵp Junior Diverse Ysgol Gynradd Holton Road. Trafododd y disgyblion rôl y grŵp a phwysigrwydd cynrychiolaeth ar gyfer cefndiroedd a diwylliannau amrywiol yn eu hysgol a’r gymuned ehangach.

Rhannodd aelodau o Junior Diverse brosiectau y maent wedi bod yn gweithio arnynt yn y dosbarth ynglŷn â hanes Pobl Dduon, prosiect celf sydd ar ddod sy'n dathlu diwylliannau amrywiol eu myfyrwyr, a pha waith y maent yn ei wneud fel ysgol i fod yn weithredol wrth-hiliol.

Cysylltodd Laura Eddins, Is-gadeirydd Amrywiol, i ddweud “roedd yn gymaint o bleser clywed gan y plant - fe wnaethon nhw godi rhai pwyntiau a syniadau diddorol iawn nad oeddem wedi eu hystyried ein hunain mewn Amrywiol. Wrth i ni symud ymlaen, rydym yn edrych i weithio mewn partneriaeth â Junior Diverse ac ymgorffori rhai o'u hawgrymiadau i'r gwaith rydym yn ei wneud ar wrth-hiliaeth a chydraddoldeb hiliol.”

Yn gyntaf ac yn bennaf, mae'n anhygoel gweld aeddfedrwydd a dealltwriaeth o'r fath gan y disgyblion. Rwy'n gobeithio trefnu i siarad â nhw'n uniongyrchol yn ystod yr wythnosau nesaf i glywed mwy am eu profiad byw. Dylid canmol staff yr ysgol hefyd am roi'r lle a'r gefnogaeth i'r disgyblion ddod at ei gilydd fel hyn.

Mae pwysigrwydd rhwydweithiau a mannau diogel wedi'i gyfleu'n gain iawn gan Curtis Griffin o'n tîm Dysgu a Sgiliau yn ei ddarn diweddar ar StaffNet+. Hoffwn ddiolch i Curtis am fod mor agored a hael wrth rannu ei stori â ni a byddwn yn argymell eich bod i gyd yn cymryd amser i'w darllen. Diolch yn fawr iawn Curtis.

Un maes lle rydym ni fel Cyngor bob amser wedi bod yn arloeswyr ac wedi cael llwyddiant gwirioneddol yn ystod y blynyddoedd diwethaf yw partneriaethau cydweithredol ag awdurdodau lleol eraill. Mae'r wythnos hon wedi gweld dau gam arall ymlaen yn y maes hwn.

Ddydd Mawrth cafwyd lansiad swyddogol Ardal, gwasanaeth caffael arloesol newydd wedi’i lansio gan Gynghorau Caerdydd, Sir Fynwy, Torfaen, a Bro Morgannwg. Gwerthoedd craidd Ardal yw caffael cymdeithasol-gyfrifol, mwy o gydweithio, ac effaith fwy ar gymuned. Mae'r bartneriaeth newydd wedi'i chynllunio i harneisio'r sgiliau, yr wybodaeth a'r arbenigedd ar draws holl gynghorau Ardal, yn ogystal â phartneriaid eraill, a bydd yn ein galluogi i ddatblygu ffyrdd mwy cost-effeithiol o gaffael nwyddau a gwasanaethau gyda'n gilydd.

Mae Gwasanaethau Rheoliadol a Rennir a'r Gwasanaeth Archwilio Mewnol Rhanbarthol eisoes wedi profi pa mor effeithiol y gellir darparu gwasanaethau'r Cyngor ar ôl troed rhanbarthol, wrth hefyd leihau'r gost i'r sector cyhoeddus. Edrychaf ymlaen at weld llwyddiant tebyg yn y fenter newydd hon. Bydd y gwasanaeth newydd hefyd yn hanfodol i sicrhau ein bod yn sicrhau gwerth mwyaf o bob ceiniog o arian cyhoeddus a gaiff ei wario yn y dyfodol. Rhywbeth sy'n bwysicach nag erioed yn yr hinsawdd ariannol sydd ohoni.

Rwyf hefyd yn falch o gael rhannu y bydd Debbie Marles, ein Swyddog Monitro a Phennaeth y Gwasanaethau Cyfreithiol a Democrataidd, hefyd yn ymgymryd â dyletswyddau'r Swyddog Monitro ar gyfer Cyngor Caerdydd am hyd at chwe mis fel rhan o gydweithrediad rhanbarthol arall.

Mae hon yn swydd bwysig iawn â phroffil uchel iawn ac mae'r ffaith bod Cyngor Caerdydd wedi cysylltu â ni yn adlewyrchu'n dda iawn ar y sefydliad, ein tîm Gwasanaethau Cyfreithiol a Democrataidd, a Debbie fel Swyddog Monitro. Heb os, mae Debbie yn arbenigwr yn ei maes ac mae ei pharodrwydd i gamu i’r adwy i gefnogi ein cymdogion yn arwydd o'i hymrwymiad i wasanaeth cyhoeddus. Bydd Debbie yn cyfuno'r ddwy rôl ac yn parhau i oruchwylio materion yn y Fro. Fel ag erioed, bydd yn cael ei chynorthwyo'n fedrus gan Victoria Davidson, Rheolwr Gweithredol Gwasanaethau Cyfreithiol a Dirprwy Swyddog Monitro.

Mae buddion cydweithio i'n trigolion yn fwyaf amlwg efallai yng ngwaith partneriaeth ein timau Gwasanaethau Cymdeithasol a'u cydweithwyr ym Mwrdd Iechyd Prifysgol Caerdydd a'r Fro. Mae'r pwysau ar ofal cymdeithasol a'r GIG yn gyson ac felly roedd yn arbennig o galonogol derbyn neges gan y Prif Swyddog Gweithredu yn y BIP yn diolch i'r Cyngor a’n cydweithwyr Gwasanaethau Cymdeithasol yn arbennig am “y gwaith a'r ymdrech aruthrol sydd wedi gweld cymaint o welliant yn y ffigurau oedi yn y llwybr gofal dros y misoedd diwethaf”.

Mae hwn wedi bod yn faes o ymdrech ddwys i dimau yn y Gwasanaethau Cymdeithasol ac mae ei effaith i'w weld yn amlwg mewn neges o ddiolch gan breswylydd a roddwyd i mi drwy'r Arweinydd yr wythnos hon. Ar ôl cael cymorth i drefnu gofal ychwanegol i’r tad ar ôl iddo ddychwelyd adref o'r ysbyty, ysgrifennodd y preswylydd “Mae wedi bod yn wych. Mae popeth wedi'i gydlynu'n dda iawn gan dîm y Fro, ar y cyd â'r BIP. Mae gofal cartref, nyrs ardal, ffisio, teleofal ac addasiadau i'r cartref i gyd wedi'u trefnu. Mae pethau yn gweithio pan fyddwch chi'n eu gwerthfawrogi. Diolch!” Er mai neges fer oedd hon, roedd ei darllen yn galonogol iawn ac yn dangos gwerth gwirioneddol y gwasanaethau rydym yn eu cynnig i'n trigolion ar yr adegau mwyaf heriol.  Da iawn a diolch.  Diolch yn fawr iawn. 

Yn olaf, gobeithio eich bod wedi gweld bod ein hymgyrch Codi Llais flynyddol yn rhedeg unwaith eto. Gall codi llais neu chwythu'r chwiban fod yn bwnc anodd ei drafod ond mae deall beth i'w wneud yn hanfodol i ddiogelu cyllid ac enw da'r Cyngor, a chadw cydweithwyr a chwsmeriaid yn ddiogel.

Yn unol â'r adborth a gafwyd gan staff y llynedd, mae'r Polisi Chwythu'r Chwiban wedi'i ddiweddaru ac rydym wedi gwella'r hyb Codi Llais ar StaffNet+. Mae'r ymgyrch eleni hefyd yn cynnwys fersiwn hawdd ei ddarllen, ac animeiddiad cryno. Bydd modiwl iDev ar gael yn fuan hefyd.

Rydym am barhau i wella'r ffordd rydym yn cefnogi cydweithwyr i roi gwybod am gamweddau ac felly mae'r arolwg eleni wedi'i gynllunio i dynnu sylw at themâu cyffredin a nodi meysydd i'w gwella. Rhowch o'ch amser i edrych ar yr ymgyrch ddiweddaraf a rhannu eich barn ar beth allwn ei wneud nesaf drwy'r arolwg diweddaraf. Diolch ymlaen llaw am eich help.

Wythnos nesaf yw hanner tymor ac i'r rheini ohonoch sy’n cymryd gwyliau, rwy'n gobeithio y gallwch ymlacio a mwynhau eich hunain. Yn wir, rwy'n gobeithio y bydd hyd yn oed y rhai nad ydynt ar wyliau yn gallu gwasgu ychydig o hyn dros y penwythnos.

Diolch i chi i gyd am eich ymdrechion yr wythnos hon.  Diolch yn fawr iawn.  

Rob.