Goroeswr camfanteisio ar blant yn arwain cynhadledd Wythnos Diogelu Genedlaethol

26 Hydref 2023

Cynhelir Wythnos Diogelu Genedlaethol, ymgyrch genedlaethol flynyddol sy'n canolbwyntio ar ystod eang o faterion diogelu sy'n effeithio ar ein cymunedau yng Nghymru fis nesaf (13-17 Tachwedd).

Yn ôl yr arfer, mae wythnos lawn o ddigwyddiadau wedi’i threfnu ar gyfer gweithwyr proffesiynol amlasiantaethol, gan gloi gyda chynhadledd Bwrdd Diogelu Caerdydd a'r Fro yn seiliedig ar y thema 'Camfanteisio'.

Y siaradwr gwadd yn y gynhadledd yn Stadiwm Dinas Caerdydd ar ddydd Gwener 17 Tachwedd yw Sammy Woodhouse, goroeswr sgandal cam-drin plant Rotherham sydd wedi ailadeiladu ei bywyd i ddod yn awdur llwyddiannus, siaradwr rhyngwladol ac actifydd sydd wedi ennill sawl gwobr.

Bydd y gynhadledd, y digwyddiad wyneb yn wyneb cyntaf ers nifer o flynyddoedd, yn cynnwys nifer o gyflwyniadau ar y gwahanol fathau o gamfanteisio ynghyd â gweithdai rhyngweithiol, ac mae wedi'i hanelu at weithwyr proffesiynol amlasiantaethol. I drefnu lle yn y gynhadledd, e-bostiwch BDRhCaerdyddarFro@caerdydd.gov.uk

Cyn y gynhadledd, mae rhaglen yr wythnos yn dechrau gyda Lansiad Rhithwir Fframwaith Hyfforddiant, Dysgu a Datblygu Safonau Diogelu Cenedlaethol, a hwylusir gan Gofal Cymdeithasol Cymru.

Mae rhai o uchafbwyntiau’r rhaglen yn cynnwys:

• Diogelu plant a Phobl Ifanc sy'n mynd ar Goll o'r Ysgol (Dydd Llun 13 Tachwedd 10.30am)

• Arwyddion a Dangosyddion Camfanteisio (Dydd Mawrth 14 Tachwedd 2pm)

• Gweithdy Adolygiad Ymarfer Plant - Rhoi Dysgu ar Waith (Dydd Iau 16 Tachwedd 1pm) - rhannu'r dysgu a'r argymhellion o Adolygiad Ymarfer Plant a gyhoeddwyd yn ddiweddar ar y thema camfanteisio troseddol.

• Fearless - Llinellau Cyffuriau a Throseddau Cyllyll (Dydd Iau 16 Tachwedd 10am)

Cynhelir sesiynau hefyd gan Barnardo's ar gyfer staff addysg - sesiwn 'Perthnasoedd Iach, Datblygiad ac Ymddygiad Rhywiol yn yr Ysgol Gynradd' ar gyfer staff ysgolion cynradd a 'Datblygiad ac Ymddygiad Rhywiol: Ystyried Bwlio ac Aflonyddu Rhywiol ymysg Plant Oedran Ysgol Uwchradd’ ar gyfer staff addysg ysgolion uwchradd, y ddau ddydd Mawrth 14 Tachwedd. 

I weld rhaglen lawn Wythnos Diogelu Genedlaethol, ac i drefnu eich lle i fynychu’r sesiynau, ewch i Bwrdd Diogelu Caerdydd a'r fro.