Yr Wythnos Gyda Rob

26 Mai 2023

Annwyl gydweithwyr,

Yn gynharach y mis hwn, defnyddiais un o'm negeseuon i staff i dynnu sylw at Ŵyl Fach y Fro, dathliad o ddiwylliant Cymru a gynhaliwyd yn Ynys y Barri y penwythnos diwethaf. Rwy'n falch iawn fy mod wedi cymryd fy nghyngor fy hun ac wedi mynd draw i weld beth oedd ar gael gan fod y digwyddiad yn hollol wych.

Wedi'i threfnu gan Menter Bro Morgannwg a'i chefnogi gan ein tîm Twristiaeth a Digwyddiadau, tynnodd yr Ŵyl Gymraeg dorfeydd enfawr i'r lle. Roedd yn cynnwys cerddoriaeth, dawns, yn ogystal â bwyd a diod, ond yr hyn a wnaeth yr argraff fwyaf arnaf oedd y rôl a chwaraeodd ein hysgolion a'u disgyblion ar hyd y dydd.

Roedd y llwyfan cymunedol yn cynnwys perfformiadau gan Ysgol Sant Baruc, Ysgol Dewi Sant, Ysgol Sant Curig, Ysgol Pen y Garth, Ysgol Gwaun y Nant, Ysgol Iolo Morgannwg, Ysgol Gynradd Oakfield, Ysgol Gynradd Colcot ac Ysgol Gynradd Tregatwg, tra bod disgyblion o Ysgol Bro Morgannwg wedi canu ar brif lwyfan yr ŵyl. Roedd y plant a'r bobl ifanc yn wych ac mae'r hyder a ddangoson nhw wrth berfformio yn dyst i gefnogaeth yr holl gydweithwyr sy'n gweithio ar draws ein hysgolion. Dylai pawb a gymerodd ran ac a chwaraeodd ran yn llwyddiant y digwyddiad fod yn falch iawn yn wir.

Hoffwn ddiolch i bawb a helpodd i baratoi disgyblion ar gyfer eu perfformiadau, y cydweithwyr yn ein tîm Twristiaeth a Digwyddiadau am eu cefnogaeth, cydweithwyr yn y Gwasanaethau Cymdogaeth a fydd wedi gweithio'n galed i sicrhau bod y seilwaith sy'n ofynnol i'r digwyddiad yn ei le, ac yn bwysicaf oll, diolch i bawb a berfformiodd a'u ffrindiau a'u teuluoedd a ddaeth i lawr i'w cefnogi.

Mae nifer y siaradwyr Cymraeg ym Mro Morgannwg yn tyfu ac mae'r addysg Gymraeg o'r radd flaenaf a gaiff ei gynnig gan ein timau yn ffactor mawr yn hyn. Mae'r Cyngor wedi buddsoddi'n sylweddol mewn addysg Gymraeg ers i Ysgol Bro Morgannwg agor bron i 20 mlynedd yn ôl.

Efallai ei bod yn eithaf addas felly bum niwrnod ar ôl yr ŵyl, ar Ddydd Iau, fe gymeradwyodd Cabinet y Cyngor i ehangu Ysgol Iolo Morgannwg yn y Bont-faen a symud yr ysgol i gyfleuster newydd o'r radd flaenaf.

Bydd y campws ysgol newydd gwerth £13.74 miliwn yn dyblu’r lleoedd ysgol i 420 erbyn mis Medi 2025 ac yn helpu i roi hyd yn oed mwy o blant yn y Fro mewn amgylchedd dysgu addas i’r 21ain Ganrif.  Bydd yr ysgol wrth galon y gymuned a bydd yn hyrwyddo addysg Gymraeg, i gefnogi ymrwymiadau'r Cyngor yn ei Gynllun Strategol Cymraeg mewn Addysg 10 mlynedd, a strategaeth Cymraeg 2050 Llywodraeth Cymru i dargedu miliwn o siaradwyr Cymraeg erbyn 2050.  Bydd campws newydd Ysgol Iolo Morgannwg hefyd yn cynnwys canolfan addysg oedolion a chanolfan drochi Gymraeg ar gyfer disgyblion oed ysgol gynradd o 7 oed ac uwch.

Mae hwn yn brosiect rhagorol arall a arweinir gan ein tîm Dysgu a Sgiliau ac a gefnogir gan gydweithwyr ar draws Adnoddau Corfforaethol. Gwaith da bawb. Rwy'n edrych ymlaen at weld y gwaith adeiladu yn mynd rhagddo y flwyddyn hon.

Boed chi wedi cyrraedd Ynys y Barri y penwythnos diwethaf ai peidio, gyda'r haul bellach yn tywynnu a gŵyl banc arall, hanner tymor a thymor yr haf nawr ar y gorwel, bydd llawer ohonoch yn siŵr o fod yn chwilio am ddigwyddiadau eraill i'w mynychu. Fel bob amser, mae ein timau'n gweithio i gefnogi rhaglen lawn o ddigwyddiadau'r haf ledled y Fro.  Mae Gŵyl Bwyd a Diod Y Bont-faen y penwythnos hwn. Ddydd Gwener nesaf fe welwch y digwyddiad diweddaraf – sef pedwarawd llinynnol cyfoes - wedi'i lwyfannu fel rhan o breswyliad Coleg Brenhinol Cerdd a Drama Cymru ar Bafiliwn Pier Penarth. Cynhelir Llwybr Bwyd y Fro yn arddangos y gorau o gynhyrchwyr y Fro rhwng 09 a 18 Mehefin. Mae Gŵyl Gelfyddydau’r 3 Ffrwd yn Llanilltud Fawr yn ystod yr un wythnos yn argoeli i fod yn arbennig. Mae’n debyg y bydd Gŵyl Drafnidiaeth y Barri  sy’n boblogaidd bob amser yn denu torfeydd mawr ar 11 Mehefin. Gallwch weld beth sydd ymlaen drwy ymweld â gwefan Ymweld â’r Fro. Mae mwy o ddigwyddiadau'n cael eu hychwanegu bob dydd

Detholiad yn unig yw hyn o'r hyn sydd i ddod. Cefnogir yr holl ddigwyddiadau hyn gan y Cyngor.  Hoffwn ddiolch i Sarah Jones ymlaen llaw am ei holl waith yr haf hwn.  Mae Sarah yn gweithio gyda threfnwyr pob digwyddiad.  Bydd y rhai ohonoch sy'n adnabod Sarah yn gwybod ei bod hi'n gorwynt o egni a brwdfrydedd ac mae ei chefnogaeth yn un o'r rhesymau pam mae cymaint o ddigwyddiadau'n dychwelyd i'r Fro flwyddyn ar ôl blwyddyn.

Mae rhaglen ddigwyddiadau'r Fro yn enghraifft wych o sut rydym wedi addasu sut rydym yn gweithio fel Cyngor er mwyn addasu i heriau economaidd y blynyddoedd diwethaf. Er nad ydym yn gallu cynnig yr un lefel o gymorth ariannol ag yn y gorffennol, mae ein timau bellach yn cefnogi trefnwyr digwyddiadau a busnesau lleol mewn ffyrdd gwahanol. Mae ein timau'n cynnig cyngor arbenigol, gwasanaethau proffesiynol, ac yn meithrin y rhwydweithiau sy'n cysylltu trefnwyr â'i gilydd. Nid oes angen cymhellion ariannol ar ddigwyddiadau mwyach i ddod i'r Fro.  Yn hytrach, maent yn cael eu denu gan y torfeydd mawr a dynnwyd i mewn gan enw da ein cyrchfannau a reolir yn dda a'r gefnogaeth y mae ein timau yn ei chynnig. Dyma waddol gwaith datblygu economaidd ein Cyngor dros nifer o flynyddoedd. Mae llawer gormod o bobl wedi bod yn rhan o hyn i'w rhestru yma ond rwy'n siŵr ein bod yn cydnabod eu cyfraniad yn fwy nag erioed wrth i dymor yr haf ein cyrraedd. Diolch.

Cytunwyd ar y bennod nesaf yn y gwaith hwn yn y Cabinet yr wythnos hon.  Nodwyd cyfres o welliannau blaenoriaeth ar gyfer Esblanâd Penarth yn dilyn rhaglen helaeth o ymgysylltu â'r cyhoedd y llynedd. Bydd y gwaith yn dechrau ar y rhain yn fuan ac rwy'n gobeithio y byddaf yn ysgrifennu cyn hir am y gwahaniaeth y maent yn ei wneud i lan y môr Penarth.

Mae pob un o'n cyrchfannau yn cael eu rheoli mewn partneriaeth ag asiantaethau eraill y sector cyhoeddus a'r wythnos hon hefyd gwelwyd y lansiad Ymgyrch Elstree. Yr haf hwn, fel pob haf, byddwn yn cyflwyno dull cydweithredol o fynd i'r afael â throseddu, pryderon diogelwch ac ymddygiad gwrthgymdeithasol ar draws cyrchfannau haf poblogaidd y Sir, yn cynnwys Ynys y Barri, Aberogwr, Llynnoedd Cosmeston, a Marina Penarth.

Bydd ein timau’n gweithio gyda Heddlu De Cymru, yr RNLI, Gwylwyr y Glannau, Gwasanaeth Tân ac Achub De Cymru, Canolfan Derbyn Larymau y Fro, Heddlu Trafnidiaeth Prydain, Gwasanaeth Ambiwlans Cymru a Chyngor Caerdydd i gynllunio ar gyfer digwyddiadau, rhannu gwybodaeth, ac adolygu a chydlynu ymatebion i ddigwyddiadau. Mae'r gwaith hwn yn cael ei arwain gan ein tîm Bro Ddiogelach ac er ei fod yn aml yn cael ei wneud y tu ôl i'r llenni mae'n hanfodol i sicrhau bod ymwelwyr â'r Fro yn gallu mwynhau eu taith.

Wedi trafod hyd yma’r gwaith gwych a wnaed yn ein hysgolion a gwerth gweithio mewn partneriaeth, hoffwn gloi gydag enghraifft sy'n tynnu'r ddau beth ynghyd. Ddydd Mawrth rhyddhawyd ffilm fer ar-lein yn arddangos gwaith Gwasanaeth Cwnsela Ysgolion a Chymuned y Fro. Mae'r cynllun yn cael ei ariannu gan Barnardo's a gynhyrchodd y ffilm hefyd.  Ers ei ryddhau Ddydd Mawrth, mae wedi cael ei weld dros 9,000 o weithiau. Mae'r ffilm yn tynnu sylw at Ffion, disgybl yn y Fro sydd wedi derbyn cefnogaeth gan y cynllun, ac os hoffech chi orffen yr wythnos gyda chip ar y gwahaniaeth mae gwaith ein cydweithwyr yn ei wneud yna byddwn yn ei argymell yn fawr

Fel bob amser rwy’n ddiolchgar am eich ymdrechion yr wythnos hon.  Diolch o galon.

Rob.