Yr Wythnos Gyda Rob

05 Mai 2023

Annwyl gydweithwyr,

Hoffwn ddechrau'r wythnos hon gyda'r newyddion bod penderfyniad y Cyngor i newid i gerbydau trydan yn 2022 wedi arbed mwy na 13 tunnell o allyriadau CO2 hyd yma.  Bydd cyflwyno cerbydau trydan yn chwarae rhan allweddol i ni gyflawni ein nod Prosiect Sero o fod yn garbon niwtral erbyn 2030. 

Fe wnaeth y cerbydau trydan sydd bellach yn ffurfio'r rhan fwyaf o'n fflyd ceir cronfa ddisodli nifer o geir disel y llynedd. Gyda dros 4000 o filltiroedd ar bob cerbyd, mae'r ceir trydan newydd wedi lleihau allyriadau CO2 y Cyngor tua 13,554kg hyd yma. Rydym hefyd wedi derbyn nifer o faniau trydan sydd bellach yn cael eu defnyddio. 

Mae'r holl gerbydau wedi'u prynu ac yn cael eu cynnal gan ein tîm Gwasanaethau Trafnidiaeth, tra bod cydweithwyr yn yr adran Eiddo wedi gosod pwyntiau gwefru yn y Swyddfeydd Dinesig a Depo’r Alpau. Efallai eich bod wedi gweld y cynllun plannu newydd yn y Swyddfeydd Dinesig o amgylch y pwyntiau gwefru sydd wedi'u cynllunio gan Jon Greatrex i gyd-fynd â'r gwefrwyr a chynyddu'r bioamrywiaeth yn yr ardal.  Dyma enghraifft wych o dimau sy'n cydweithio i gyflawni ein hymrwymiadau i'r Fro.  Diolch bawb.

Ddydd Mercher yr wythnos hon, fe wnes i a’r Arweinydd gwrdd â chydweithwyr o bob rhan o'r cyhoedd a'r trydydd sector yn y Fro i lofnodi Cynllun Lles y Bwrdd Gwasanaethau Cyhoeddus ar gyfer 2023-2028. Mae'r cynllun uchelgeisiol hwn yn amlinellu sut y gallwn gydweithio er mwyn gwella lles trigolion yn y Fro trwy weithredu ar y cyd.  Mae'r cynllun yn canolbwyntio ar dri amcan lles:

Bro gwydn a gwyrdd - drwy ddeall a gwneud y newidiadau sy'n angenrheidiol fel unigolion, cymunedau a sefydliadau mewn ymateb i'r argyfyngau hinsawdd a natur.

Bro actif ac iach – drwy annog a galluogi pobl o bob oed i fod yn fwy actif a hyrwyddo manteision cofleidio ffordd o fyw iachach.  

Bro teg a chysylltiedig - drwy fynd i'r afael â'r annhegwch sy'n bodoli ledled y Fro, ymgysylltu â'n cymunedau a darparu gwell cyfleoedd a chefnogaeth i wneud gwahaniaeth parhaol.

Bydd gwaith nawr yn parhau ar dair ffrwd waith blaenoriaeth er mwyn ymateb i'r argyfyngau hinsawdd a natur, gweithio gyda'r bobl sy'n byw yn ein cymunedau sy'n profi'r lefelau uchaf o amddifadedd a dod yn Fro sy'n dda i bobl hŷn. 

Byddaf yn rhannu mwy o wybodaeth yn ystod yr wythnosau nesaf, ond hoffwn ddiolch o galon i'r tîm dan arweiniad Helen Moses am y gwaith hwn a fydd yn gwneud gwahaniaeth gwirioneddol i sut yr ydym yn gweithio, ac i fywydau ein trigolion.  Diolch Helen – da iawn ti.

Hefyd yn y newyddion yr wythnos hon fu peilot llwyddiannus ein prosiect Strydoedd Chwarae newydd sy'n cael ei arwain gan ein Tîm Chwarae.  Mae Strydoedd Chwarae, neu sesiynau chwarae’r tu allan, yn orchmynion cau ffyrdd dros dro sy'n creu lle diogel i blant chwarae gyda'i gilydd y tu allan i'w cartrefi. Mae'r rhain eisoes wedi bod yn boblogaidd mewn rhannau eraill o'r DU ac mae'r tîm wedi bod yn gweithio gyda Chwarae Cymru i ddod â'r fenter i'r Fro.

Mae gan chwarae fuddion iechyd a lles hysbys ac mae'r prosiect yn rhan o gynllun y Cyngor i adeiladu Bro weithgar ac iach.  Bydd y cynllun peilot yn parhau am y 12 mis nesaf ac os bydd yn llwyddiannus bydd y cynllun yn cael ei gyflwyno i leoliadau eraill.  Os bydd hyn yn digwydd, yna dylai Strydoedd Chwarae hefyd gael effaith gadarnhaol ar ansawdd aer drwy leihau allyriadau carbon yn ystod y cyfnodau lle bydd ffyrdd ar gau gan eto gyfrannu at Prosiect Sero. Hoffwn ddiolch i'r tîm sydd wedi gweithio mor galed i lansio'r peilot.  Mae'r lluniau o'r plant a'r bobl ifanc hynny yn mwynhau'r sesiwn yn dweud y cyfan am ba wahaniaeth mae eich gwaith yn ei wneud.

Os hoffech wybod mwy am yr hyn rydym yn ei wneud i fynd i'r afael â newid yn yr hinsawdd a sut y gallwch gymryd rhan yna bydd Wythnos Dysgu yn y Gwaith 2023 yn rhoi cyfle i chi.  Yn ystod Wythnos Dysgu yn y Gwaith, rhwng 15 a 19 Mai, byddwn yn ymuno â sefydliadau ledled y wlad i ddathlu pwysigrwydd dysgu a datblygu parhaus. 'Creu dyfodol gwell gyda'n gilydd:  Trafod Ymdrechion Newid yn yr Hinsawdd a Eich Syniadau Prosiect Sero yw un o'r sesiynau cyntaf y gellir trefnu lle ar eu cyfer a gall cydweithwyr gofrestru nawr. Bydd llawer mwy o weithgareddau yn rhan o'r wythnos a bydd manylion y rhain yn cael eu rhannu cyn y pymthegfed. 

Fel yr ydych eisoes wedi’i weld o bosib yr wythnos hon mae gennym gydweithiwr newydd sy'n gofyn i bawb gymryd yr amser i wella eu gwybodaeth. Mynychodd Bobi Mynediad Diawdurdod at Ddata gyfarfod yr UDA yr wythnos ddiwethaf ac mae bellach yn helpu pob cydweithiwr i wneud eu rhan a bod yn ddeallus o ran data. Mae'r ymgyrch yn fwriadol ysgafn ei natur er mwyn tynnu sylw at fater difrifol. Fel Cyngor, rydyn ni'n casglu llawer o ddata personol am y rhai sy'n defnyddio ein gwasanaethau. Mae gennym ddyletswydd i ofalu am y data hwnnw'n gywir. Weithiau, wrth gwrs, gall pethau fynd o'i le a'r neges y mae Bobi am ei rhannu yw pan fydd pethau’n mynd o’i le y dylid rhoi gwybod ar unwaith i'r Tîm Llywodraethu Gwybodaeth sydd yno i helpu. Diolch i bawb sydd wedi helpu i ddod â Bobi'n fyw ac i'r cydweithwyr hynny yn ein timau Gwasanaethau Cyfreithiol a TGCh sy'n gweithio'n gyson i sicrhau pan fyddwn yn casglu gwybodaeth pobl rydym yn ei storio a'i rhannu'n ddiogel. 

Yn olaf, fel y clywodd rhai ohonoch chi, mae digwyddiad yn cael ei gynnal yn Llundain y penwythnos hwn. 

Ymhlith y gwesteion eraill sydd wedi derbyn gwahoddiad yn Abaty Westminster ddydd Sadwrn fydd Sharon Miller o Gyngor Bro Morgannwg.  Mae Sharon, a dderbyniodd Anrhydeddau Arbennig yn 2020 am ei gwaith rhyfeddol yn ystod y pandemig, wedi cael gwahoddiad i fynd yno i gydnabod ei hymroddiad i ofal cymdeithasol. Rwy'n gwybod y bydd Sharon yn defnyddio'r cyfle hwn, yn union fel y mae hi'n defnyddio unrhyw un arall, i amlygu cyflawniadau gwych ein holl weithwyr gofal yn y Fro.

Hoffwn ddod â fy neges i ben yr wythnos hon gyda sylwadau Sharon, a dyna fydd yn gwneud i mi deimlo'n anhygoel o falch y penwythnos hwn. 

"Mae'n anrhydedd cael y cyfle i gynrychioli maes mor anhygoel a rhannu'r gydnabyddiaeth hon gyda fy nghydweithwyr.  Mae'r gydnabyddiaeth yn dyst i bwysigrwydd gofal cymdeithasol yn ein cymdeithas a'r effaith gadarnhaol y mae'n ei chael ar fywydau'r unigolion a'r cymunedau bregus rydym yn eu cefnogi.  Rwy'n ddiolchgar am y cyfle i ddathlu ein llwyddiannau a hoffwn estyn fy llongyfarchiadau a diolch i bawb sy'n gweithio ym maes gofal cymdeithasol am y gwaith caled a'r ymroddiad y maent yn ei gyflwyno i'w rolau i wella bywydau pobl eraill."

Da iawn Tîm y Fro. 

Rwy'n gobeithio y bydd y rhai a fydd yn cael penwythnos hirach yn ei fwynhau. Diolch yn fawr pawb am eich holl ymdrechion yr wythnos hon,

Rob