Yr Wythnos Gyda Rob

04 Awst 2023

Annwyl gydweithwyr,

Hoffwn ddechrau'r neges hon trwy eich diweddaru ar rywfaint o newyddion trist a rannais yn gynharach yn yr wythnos.  

Bu farw Graham Conibear yn ddiweddar, cyn-aelod staff poblogaidd iawn, a dreuliodd dros 30 mlynedd yn gweithio i'r Cyngor, ac mae gennyf fanylion pellach am y trefniadau angladd.

Bydd gwasanaeth yn amlosgfa’r Barri am 12 canol dydd ar Ddydd Mawrth 22 Awst ac yna gwylnos yng nghlwb Golff Bryn Hill, ac mae teulu Graham wedi dweud bod croeso i bawb sy'n gallu mynychu. Rwy'n siŵr y byddwch yn ymuno â mi eto i gydymdeimlo'n ddiffuant a nhw yn eu colled.

Mae'r Gwobrau Womanspire, a drefnir gan Chwarae Teg, yn cydnabod cyflawniadau menywod ym mhob agwedd ar fywyd, o lwyddiannau personol i gyfraniadau rhagorol.

Enwebwyd Carole am ei gwaith gyda Big Fresh, cwmni arlwyo annibynnol y Cyngor, sy'n darparu prydau ysgol am ddim a gwasanaethau i ddisgyblion ledled y Fro, ochr yn ochr â gweithrediadau eraill.

Ar ôl dechrau ei gyrfa mewn ceginau ysgol, mae Carole wedi esgyn i fod yn gyfrifol am dros 230 o staff, gan ddosbarthu dros 15,000 o brydau bwyd i ddisgyblion bob dydd.

Mae hi hefyd wedi bod yn sbardun y tu ôl i'r Fro yn dod yn un o ddim ond llond llaw o Awdurdodau Lleol yng Nghymru i gynnig y prydau hyn am ddim i bob disgybl ysgol gynradd.

Rwy'n siŵr y byddwch chi'n ymuno â mi i longyfarch Carole ar gyrraedd rownd derfynol y gwobrau - Carole, mae'r gydnabyddiaeth yn haeddiannol iawn, a phob dymuniad da ar gyfer Tachwedd 9 pan gyhoeddir yr enillydd.

Gan gadw at Ddysgu a Sgiliau, roeddwn hefyd eisiau trosglwyddo fy ngwerthfawrogiad i Morwen Hudson, Martin Dacey a phawb sydd wedi bod yn rhan o'r ymgyrch Presenoldeb Ysgol.

Mae llawer o waith caled wedi gweld y Fro yn gwella'n sylweddol yn y maes hwn i ddod yn un o'r chwe Awdurdod Lleol sy'n perfformio orau yng Nghymru.

Rwy'n gwybod bod Martin yn arbennig o ddiolchgar am y gefnogaeth a gafwyd gan adrannau eraill, a oedd yn enghraifft dda o'r math o waith traws-gyfarwyddiaeth yr ydym yn ymdrechu i’w wireddu yn ein sefydliad.

Da iawn i bawb a gymerodd ran. Diolch yn fawr iawn. 

Achosodd digwyddiad TGCh mawr darfu difrifol ddechrau'r wythnos wrth i lawer o staff brofi problemau rhwydwaith a chysylltu.

Hoffwn ddiolch i gydweithwyr o'r adran honno, y Tîm Eiddo a'n swyddogion Cynllunio Brys am y gwaith caled wnaethon nhw i sicrhau bod popeth yn rhedeg fel y dylai mor brydlon.

Bu rhai yn gweithio o oriau mân fore Llun i ddatrys y problemau a sicrhau y gallai pawb fynd yn ôl i fusnes fel arfer cyn gynted â phosib. Gwerthfawrogir yr ymdrechion hynny'n fawr iawn. Diolch.

Roeddwn hefyd am dynnu eich sylw at yr ymgynghoriad ar ein Strategaeth Ddigidol Ddrafft, sydd ar agor tan 8 Medi.

Dyma'r darn diweddaraf o waith ar draws y Cyngor sy'n helpu i siapio'r cyngor ar gyfer y dyfodol ac mae'n adeiladu ar ein Strategaeth Pobl, gwaith ar Prosiect Sero a'r Strategaeth Ariannol.

Mae'r Strategaeth Ddigidol ddrafft newydd hon yn nodi gweledigaeth uchelgeisiol i'r sefydliad drawsnewid ein dulliau digidol. Byddwn yn ceisio gweithio gyda’n gilydd a gyda'r gymuned mewn ffyrdd newydd i drawsnewid ein gwasanaethau a chofleidio'r potensial y mae technoleg ddigidol yn ei gynnig.

Rwy'n ddiolchgar iawn i'r dros gant o gydweithwyr a gymerodd ran mewn gweithdai yn gynharach eleni, a hwyluswyd gan y Gymdeithas dros Arloesedd, Technoleg a Moderneiddio, yn helpu i lunio'r weledigaeth a'r themâu allweddol ar gyfer y strategaeth hon.  Diolch i chi am y rôl rydych chi wedi'i chwarae i’n helpu ni i gyrraedd y sefyllfa hon.

Mae cyflymder y newid wedi cyflymu yn ystod y blynyddoedd diwethaf, yn enwedig o ganlyniad i'r pandemig a wnaeth chwyldroi’r ffordd y mae llawer ohonom yn gweithio ac yn rhyngweithio.  Roedd hwn hefyd yn gyfnod o ddysgu a buddsoddi, ac mae'r strategaeth hon yn ceisio adeiladu ar ein cyflawniadau blaenorol a thrawsnewid ein diwylliant digidol ymhellach.

Mae'n gosod gweledigaeth uchelgeisiol ger bron i'r sefydliad chwyldroi ein hymagwedd at y byd digidol.

Ein gweledigaeth ddigidol yw ein bod "Yn agored i ffyrdd newydd o weithio gyda’n gilydd a gyda'r gymuned i wella ein gwasanaethau. Yn uchelgeisiol ac yn falch o drawsnewid ein diwylliant digidol er mwyn datgloi ein potensial digidol”.

Mae'r strategaeth ddrafft yn cynnwys pedair thema:

• Cymuned a Chyfranogiad
• Trefniadaeth a Phrosesau
• Pobl a Sgiliau Digidol
• Data a Dirnadaeth

Rydym nawr yn gofyn am safbwyntiau ein holl gydweithwyr a'n partneriaid ar gynnwys y strategaeth ddrafft.   Rydym yn chwilio'n benodol am farn ar y themâu a'r camau gweithredu sy'n nodi sut y bydd y weledigaeth yn cael ei chyflawni. Byddwn yn ddiolchgar pe baech yn cymryd yr amser i ddarllen y strategaeth ddrafft a rhannu eich  safbwyntiau. 

Ymwelodd yr Arweinydd a minnau â datblygiad newydd yn Llys St Cyres yn ddiweddar, y diweddaraf mewn cyfres o brosiectau er mwyn helpu i fynd i'r afael ag angen sylweddol am dai yn y Fro.

Codwyd 14 fflat un ystafell wely ar gyfer pobl dros 55 oed a'u gorffen i safon uchel iawn.

Mae Andrew Freegard wedi gwneud gwaith gwych yn goruchwylio’r cynllun hwn a chynlluniau tebyg. Llongyfarchiadau mawr i Andrew. 

Gall pob eiddo letya dau berson ac mae'r cynllun yn cynnwys mannau parcio pwrpasol a gardd gymunedol heb fawr o angen cynnal a chadw arni. ‍‍

Mae'r ystafelloedd wedi'u haddasu'n arbennig ar gyfer y rhai sydd â phroblemau symudedd ac maent yn cynnwys lifft i bob llawr, cyfleusterau storio a choridorau llydan. 

Mae cyfanswm o dri llawr, gyda phob fflat yn cynnwys ystafell wely, cegin a lolfa, ac ystafell wlyb.

Mae'r datblygiad hwn yn dilyn y 23 o gartrefi newydd a adeiladwyd ar Hayes Road a’r 28 a godwyd yn Llys Llechwedd Jenner yn y Barri.

Mae cynllun i adeiladu 11 o gartrefi newydd yn Holm View yn y Barri, y mae pedwar ohonynt yn fyngalos wedi'u haddasu'n arbennig i fodloni anghenion aelod anabl o'r teulu, hefyd wedi’i gwblhau. 

Mae galw mawr am yr eiddo yma gan fod nifer cynyddol o bobl angen tai Cyngor. Mae datblygiadau fel hyn yn gwneud gwahaniaeth gwirioneddol i fywydau pobl, gan roi cartrefi o ansawdd uchel iddynt fyw ynddyn nhw. Da iawn bawb.

Ddydd Mawrth oedd diwedd Mis Balchder Anabledd, a oedd yn cynnig cyfle i gyflogwyr ddathlu, codi ymwybyddiaeth ac amlygu lleisiau amlwg yn y maes hwn.

Gyda hynny mewn golwg, hoffwn dynnu eich sylw at Grŵp Cefnogi Anabledd Staff y Fro, a ffurfiwyd yn gynharach eleni ac sy'n cyfarfod yn rheolaidd.

Mae cydweithwyr sydd â phrofiad o anabledd, afiechyd meddwl a niwroamrywiaeth yn cael eu hannog i rannu eu barn ar sut y gall yr Awdurdod ddarparu ar gyfer eu hanghenion yn well.

Efallai y bydd gan bobl syniadau ar sut y gellid gwella'r gweithle fel bod pawb yn teimlo eu bod wedi'u cynnwys a'u cefnogi'n llawn.

Am ragor o wybodaeth cysylltwch â Colin Davies.

Hoffwn orffen y diweddariad hwn trwy ddymuno pob lwc i bawb sy'n cymryd rhan yn 10k Ynys y Barri Ddydd Sul.

Gobeithio y bydd y tywydd yn aros yn sych ac y byddwch yn gorffen gyda'r amser rydych chi’n gobeithio ei gael.

Beth bynnag yw eich cynlluniau y penwythnos hwn, mynnwch ychydig ddyddiau pleserus ac ymlaciol ac, fel bob amser, diolch yn fawr iawn i chi am eich ymdrechion yr wythnos hon.

Diolch yn fawr iawn,

 Rob