Yr Wythnos gyda Rob

17 Mehefin 2022

Annwyl gydweithwyr, 

Gobeithio eich bod yn iach ac wedi cael cyfle i fwynhau'r tywydd braf yr wythnos hon. 

Mis Mehefin yw mis Pride. Os ydych wedi bod i'r Swyddfeydd Dinesig yn ystod y pythefnos diwethaf byddwch wedi gweld baner yr enfys yn cyhwfan y tu allan. Mae Cyngor Bro Morgannwg yn Hyrwyddwr Amrywiaeth Stonewall Cymru, sy'n golygu ein bod wedi ymrwymo i weithio tuag at weithle mwy cynhwysol.  Rydym yn gweithio'n galed iawn i sicrhau ein bod yn cynnig lle diogel a phleserus i bobl LGBTQI+ weithio.  Gallwch gael rhagor o wybodaeth am StaffNet+ ac os hoffech gymryd rhan yn hyn, neu os oes gennych unrhyw awgrymiadau ar sut i wneud pethau'n well, gallwch gysylltu â GLAM, ein Rhwydwaith Staff LGBT+.

Trafodwyd sut y gallwn wneud mwy i fod yn sefydliad cynhwysol yng nghyfarfod ar y cyd y Cabinet a'r Tîm Arweinyddiaeth Strategol Ddydd Iau ochr yn ochr â llawer o'r materion mawr yr ydym ni, a'n trigolion, yn eu hwynebu ar hyn o bryd.  Roedd costau byw wrth gwrs yn bwnc trafod mawr.  Hoffwn ddiolch eto i'r holl gydweithwyr hynny sy'n gweithio i weinyddu taliadau cymorth a dod o hyd i ffyrdd newydd o ddarparu gwasanaethau sy'n cefnogi dinasyddion.  Gwn fod cydweithwyr o'r Gwasanaethau Corfforaethol wedi cyfarfod yr wythnos hon â'r Ganolfan Cyngor ar Bopeth i ddod o hyd i ffyrdd y gallem weithio'n agosach a'i gwneud yn haws i bobl gael gafael ar y cymorth sydd ei angen arnynt. 

Ar nodyn tebyg, hoffwn ddiolch hefyd i'r cydweithwyr hynny sy'n gweinyddu taliadau ar hyn o bryd i'r ffoaduriaid hynny o'r rhyfel yn Wcráin sydd bellach yn byw yn y Fro, a'r teuluoedd sydd wedi agor eu cartrefi iddynt. Hyd yma, mae cyfanswm o £19,800 o daliadau wedi'u gwneud i bron i 100 o bobl.

Rwy'n siŵr nad ef yw'r unig aelod o'r tîm i wneud hynny ond hoffwn ddiolch yn arbennig i Richard Taylor sydd, mi glywaf, wedi ychwanegu 'Dobroho ranku' a 'Dobry den' – bore da a phrynhawn da yn Wcreineg – i'w eirfa i’w helpu i wneud i'r rhai rydym yn eu helpu deimlo'n fwy cartrefol. Dyakuyu tobi a diolch yn fawr i Richard a'r tîm cyfan. 

Roeddwn yn falch o gael cysylltu â Charlotte Raine o'r tîm Adfywio a Chynllunio yn gynharach yr wythnos hon a roddodd dynnodd sylw at gydweithwyr y mae wedi gweithio'n agos gyda nhw ar brosiectau yn y gymuned.  Ysgrifennodd Charlotte:

"Roeddwn i jyst eisiau anfon neges i weld a allech chi roi rhywfaint o gydnabyddiaeth i Martin Andrews yr wythnos hon a hefyd Jon Greatrex - y ddau yn yr Adran Barciau.

Mae Martin yn arbennig wedi achub fy nghroen sawl gwaith dros y pythefnos diwethaf – danfon llythyrau â llaw er mwyn paratoi ar gyfer dau gynllun i sicrhau bod preswylwyr yn cael cymaint o rybudd â phosibl (cyn gynted ag y byddwn yn gofyn, roedd wedi gwneud hynny o fewn diwrnod), gan dynnu lluniau i gael tystiolaeth fel y gallaf dystio i’r gwaith gael ei wneud, ac yn gyffredinol mae gweithredu mor effeithlon ar rai prosiectau sy’n hynod frys.

Mae Jon Greatrex hefyd wedi bod yn wych wrth baratoi prosiect Belle Vue. Gyda'r gwaith i fod i ddechrau ar y safle ar 20 Mehefin mae wedi mynd y tu hwnt i’r gofyn i geisio cael yr holl fesurau dros dro ar waith gyda'r Adran Eiddo, erbyn y bydd y gwaith yn dechrau.

Chwaraewyr tîm gwych tra fy mod i wedi bod yn ceisio rheoli prosiectau S106 a gwaith newydd sy'n codi yn fy rôl newydd".

Diolch am ddweud Charlotte ac mae hyn yn dystiolaeth gadarn o'r gwaith gwych sy'n digwydd pan fyddwn yn gweithio ar draws adrannau mewn partneriaeth. Diolch yn fawr i bawb – cadarnhaol dros ben.

Trafodwyd ymdrechion ein tîm Cyllid gan Tom Bowring, ein Cyfarwyddwr Adnoddau Corfforaethol newydd, yn ei sesiwn Hawl i Holi yn gynharach yr wythnos hon. Gallwch ei wylio nawr ar-lein.  Mae cyfle o hyd hefyd i archebu ar gyfer y sesiwn wedi'i had-drefnu gyda'n Cyfarwyddwr Lleoedd newydd, Marcus Goldsworthy.  Rwy'n gwybod bod Tom hefyd wedi ateb rhai cwestiynau am gymorth llesiant i gydweithwyr a hoffwn ychwanegu at ei sylwadau gyda newyddion am ddau ddatblygiad diweddar.

Yn gyntaf, i'r rhai sy'n gweithio o dro i dro o'r Swyddfeydd Dinesig, mae'r gofod iard staff bellach wedi'i orffen. Hoffwn ddiolch i gydweithwyr o Eiddo, Gwasanaethau Adeiladu, Gwasanaethau Cymdogaeth ac Adnoddau Dynol a fu'n gweithio gyda'n Hyrwyddwyr Llesiant  a chydweithwyr eraill i wneud i hyn ddigwydd. Mae'r lle yn agored i bawb ac mae'n darparu ardal i bob cydweithiwr ddianc o'u desgiau a mwynhau ychydig o awyr iach, yn ogystal â man cyfarfod llai ffurfiol.  Yn ail, bydd dwy sesiwn ffitrwydd corfforol ar-lein newydd ar agor i staff o'r wythnos nesaf ymlaen.  Unwaith eto, bydd y rhain yn agored i bawb ac yn gwbl rhad ac am ddim.

Cynhelir sesiynau Ioga Ar-lein am 6pm bob dydd Mawrth a sesiwn HIIT wyneb yn wyneb yng Nghampfa Crossfit y Fro ar Heol Holton, Y Barri am 12pm bob dydd Mercher. Bydd gwybodaeth ar gael ar StaffNet+ yr wythnos nesaf neu gallwch gysylltu â'n Hyrwyddwyr Lles i gael gwybod mwy.

Llesiant ein cydweithwyr yw un o brif bryderon yr Uwch Dîm Rheoli ac mae’n rhywbeth yr ydym bob amser yn ceisio dod o hyd i ffyrdd newydd o'i gefnogi. Dyna pam y bydd yn thema ganolog i Arolwg Staff 2022 a fydd yn cael ei lansio yn ystod yr wythnosau nesaf.  Bydd gennyf fwy o wybodaeth am hyn yn fy neges yr wythnos nesaf.  Bydd yr arolwg yn rhoi cyfle i bawb rannu eu barn ar wahanol faterion yn gyfrinachol ac mae'n cael ei chynllunio i gasglu'r ddealltwriaeth sydd ei hangen arnom fel sefydliad i adeiladu ein ffyrdd ôl-Covid o weithio yn unol â'r hyn sy'n bwysig i'n staff.  

Hoffwn dynnu'ch sylw at yr ymgyrch Siarad Allan sy'n cael ei gynnal ar hyn o bryd. Rwyf am i'n Cyngor fod yn un lle mae pawb yn teimlo y gallant siarad allan os ydynt yn gweld rhywbeth sy'n anghywir yn eu barn nhw.  Mae siarad allan neu chwythu'r chwiban yn cael effaith gadarnhaol ar y sefydliad, gan ddiogelu cyllid ac enw da'r Cyngor, tra'n cadw cydweithwyr a chwsmeriaid yn ddiogel.  Os nad ydych wedi cael cyfle eto i ddarllen y wybodaeth ar ein hyb Siarad Allan newydd yna gwnewch hynny. 

Yn olaf, byddwch yn awr yn nodi bod y dyddiad cau ar gyfer gwobrau'r Staff wedi'i ymestyn a'i fod bellach yn hanner nos Ddydd Gwener 24 Mehefin.  Mae amser o hyd i gael eich cynigion i mewn.  Rwyf wedi siarad â llawer o bobl dros yr wythnos diwethaf a gwn fod cydweithwyr ar draws y sefydliad yn brysur iawn a bod rhai wedi bod yn gohirio gwneud cyflwyniadau am y rheswm hwn.   Rwy'n sylweddoli bod neilltuo amser yn anodd ond mae'r digwyddiad gwobrwyo yn bwysig iawn – mae'n ffordd o ddathlu'r holl waith da sy'n digwydd ar draws y sefydliad cyfan ac mae'n ffordd o gydnabod y timau, yr unigolion a'r prosiectau hynny sy'n ganolog i lwyddiant y Cyngor o ran gwneud gwahaniaeth i'r cymunedau hynny yr ydym yn eu gwasanaethu.   Felly, lle bynnag yr ydych yn gweithio, ym mha bynnag adran neu ysgol, cyflwynwch eich ceisiadau fel y gallwn gael y digwyddiad gwobrau gorau a mwyaf cynhwysol eto i arddangos popeth sy'n dda am weithio i'r Fro. 

Diolch fel bob amser am eich ymdrechion yr wythnos hon. Diolch yn fawr bawb.

Rob.