Diwrnod Rhyngwladol i Bobl ag Anableddau - 3 Rhagfyr 2022

 

 

 

 

 

 

Rydym yn nodi Diwrnod Rhyngwladol Pobl sydd ag Anableddau bob blwyddyn ar 3 Rhagfyr.  Mae wedi’i gynnal ers 30 mlynedd – ers 1992.

Nod y diwrnod, a ddechreuwyd gan y Cenhedloedd Unedig, yw creu cefnogaeth i gynnwys pobl ag anableddau a chodi ymwybyddiaeth am faterion anabledd.  Mae hefyd yn hyrwyddo hawliau a lles pobl ag anableddau ar bob lefel o gymdeithas.

Mae cynhwysiant anabledd yn ymwneud â gwerthfawrogi gwahaniaethau a chryfderau pobl a chael gwared ar yr anawsterau a allai eu dal yn ôl.

Nid yw pob anabledd yn weladwy.

Yn 2022, y thema ar gyfer Diwrnod Rhyngwladol i Bobl ag Anableddau yw 'Nid yw pob anabledd yn weladwy'.  Mae rhai anableddau, fel anhwylderau iechyd meddwl, poen cronig, blinder cronig a niwroamrywiaeth yn anweledig - ond nid yw hynny'n golygu eu bod yn cael llai o effaith ar ansawdd bywyd rhywun.  

Mae’r Diwrnod Rhyngwladol i Bobl ag Anableddau yn rhoi cyfle i feddwl am wneud y gweithle yn fwy hygyrch a pha addasiadau rhesymol y gallwn eu gwneud i sicrhau bod cydweithwyr ag anableddau yn gallu cyfrannu a pherfformio'n llawn fel rhan o'n tîm ehangach.

Gweithio tuag at ddod yn Gyngor cynhwysol

 

 

 

Rydym wedi ymrwymo i newid sut rydym yn meddwl ac yn ymddwyn mewn perthynas ag anableddau ac iechyd meddwl yn y gweithle ac i sicrhau bod cyflogeion sy’n wynebu’r problemau hyn yn teimlo eu bod yn cael cefnogaeth.  Rydym eisoes wedi llofnodi adduned cyflogwr Amser i Newid.  Rydym yn sefydliad Hyderus o ran Anabledd.

Rydym yn ymrwymedig i hyrwyddo diwylliant cynhwysol i bob aelod staff.

Beth gallwch chi ei wneud?

Ymunwch â ni a'r Cenhedloedd Unedig wrth nodi’r Diwrnod Rhyngwladol i Bobl ag Anableddau er mwyn pwysleisio pwysigrwydd sicrhau hawliau pobl ag anableddau.  Bydd hyn yn helpu pawb i gymryd rhan mewn cymdeithas yn llawn ac yn effeithiol, heb wynebu unrhyw rwystrau mewn bywyd.

Helpwch ni i sefydlu rhwydwaith staff anabl

Yn ystod Wythnos Genedlaethol Cynhwysiant, fe wnaeth y Cyngor addewid i ymrwymo i gynhwysiant. Gallwch ddarllen yr erthygl honno a darnau eraill ynglŷn â’r Wythnos Genedlaethol Cynhwysiant yma. Gwahoddwyd pobl i fynegi eu diddordeb mewn ymuno â rhwydwaith staff anabl hefyd. 

Rydym eisoes yn gweithio gyda dau rwydwaith staff – Diverse ar gyfer aelodau staff o gefndir du a lleiafrifoedd ethnig a GLAM ar gyfer staff LHDTC+.  Mae'r rhwydweithiau'n rhoi llais i bobl i wneud yn siŵr ein bod ni'n ystyried y materion sy'n effeithio arnyn nhw yn y gweithle.  Byddai'n ddefnyddiol clywed gan gydweithwyr ag anableddau er mwyn i ni allu ystyried eu hanghenion ym mholisïau ac arferion y gweithle. 

Os hoffech gymryd rhan, cysylltwch â Colin Davies. 

Os ydych yn pryderu am wahaniaethu neu aflonyddu, neu os ydych am gael rhagor o wybodaeth am sut i adrodd am hyn, gweler polisi cwynion Cyngor Bro Morgannwg.