Yr Wythnos gyda Rob

01 Ebrill 2022

Annwyl gydweithwyr, 

Gobeithio eich bod yn cadw’n dda wrth i’r neges hon eich cyrraedd ar ddiwedd wythnos brysur arall yn y Fro.

Wrth i fis Ebrill gyrraedd, mae'r gwanwyn yn bendant yn yr awyr, ac mae'r tywydd braf yn cynnig mwy o gyfleoedd i gymryd rhan yn ein hymgyrch Milltiroedd ar gyfer Wcráin i gefnogi pobl yr effeithir arnynt gan y gwrthdaro ofnadwy hwnnw.

Rwy’n teimlo’n hynod wylaidd yn wyneb ymateb y staff i'r fenter hon hyd yn hyn. 

Bellach yn ei thrydedd wythnos, mae staff wedi cwblhau bron i 1,500 milltir ar ein taith rithwir o'r Barri i ffin Wcráin, gan gymryd rhan mewn gweithgareddau sy'n cynnwys cerdded, rhedeg a hyd yn oed gwau!

Rydym bellach lai na 300 milltir i ffwrdd, ond nid yw hynny'n rheswm dros orffwys ar ein rhwyfau gan fod y penwythnos hwn yn addo amodau gwych ar gyfer ymarfer corff a bod yn yr awyr agored. 

Po fwyaf yw'r pellter a gwmpesir, y mwyaf o gymorth y gallwn ei gynnig, a phwy a ŵyr, efallai y byddwn hyd yn oed yn ei wneud yn ôl i'r Barri!

Bydd yr ymgyrch godi arian hon ar agor tan ddiwedd mis Ebrill felly mae digon o amser o hyd i gynllunio eich gweithgaredd.

Gobeithio y gallwn barhau â'r momentwm gwych a ddangoswyd hyd yn hyn dros y mis nesaf.

Hyd yma, mae dros £1,300 wedi'i godi ar gyfer Apêl Dyngarol Wcráin y Pwyllgor Argyfwng Trychinebau drwy roddion ac ymdrechion codi arian.

Mae'r Tîm Cyfrifeg wedi cerdded o amgylch Parc Romilly a'r Cnap, mae Vicki Walker a Chris Keepins o'r Tîm Rheoli Adeiladu wedi dringo Pen y Fan a'r Tîm Cymunedau Gwledig Creadigol wedi cerdded darn hir o Daith Gerdded Treftadaeth Iolo Morgannwg drwy diroedd ffermydd, coetir a threftadaeth hardd.

Mae Llynnoedd Cosmeston wedi bod yn lleoliad poblogaidd ar gyfer gweithgarwch, gyda'r timau Datrysiadau Tai, Homes 4 U, Rheoli Adnoddau a Diogelu i gyd yn cerdded yno.

Ymunodd y Tîm Adnoddau a Chynllunio â chydweithwyr o Berfformiad a Gwybodaeth i gerdded ar hyd Ynys y Barri a'r Promenâd, tra cynhaliodd tîm Ymweld â’r Fro gyfarfod tîm yno hefyd i godi arian at yr achos.

Hoffwn gyfleu fy ngwerthfawrogiad diffuant o bopeth y mae staff wedi'i wneud i gefnogi'r ymgyrch hon.

Bydd yr arian a godir yn gwneud gwahaniaeth gwirioneddol i'r rhai y mae'r rhyfel yn effeithio arnynt waethaf.

Gall unrhyw dîm sy'n dymuno cymryd rhan gofnodi eu milltiroedd ar Hyb Milltiroedd ar gyfer Wcráin ar Staffnet a gellir gwneud rhoddion drwy'r dudalen Just Giving.

Rwy’n gwybod bod gwaith arall yn mynd rhagddo yn y Cyngor i gefnogi ffoaduriaid Wcráin, a rhaid i mi dalu teyrnged i Tom Dodsworth a Mike Ingram sydd ar flaen y gad yn hyn o beth. Maent yn gweithio gyda chydweithwyr eraill yn y sector cyhoeddus i helpu i drefnu'r ffordd orau o fodloni anghenion unigolion sy'n cyrraedd o'r gwrthdaro hwnnw.

Unwaith eto, mae hyn yn dangos sut y gall y Cyngor, yn real iawn, gael effaith gadarnhaol ar fater byd-eang.

Mae'n bwysig hefyd ein bod yn gwneud gwahaniaeth yn lleol a'r wythnos hon mynychodd rhai cydweithwyr y gynhadledd 'Cryfach Gyda'n Gilydd' New Local ar rymuso cymunedau.

Mae New Local yn felin drafod annibynnol a llywodraeth leol sy'n ceisio trawsnewid gwasanaethau cyhoeddus a datgloi potensial cymunedol.

Bydd sesiwn hefyd yn cael ei hwyluso gan gydweithwyr o New Local ar gyfer Prif Swyddogion yr wythnos nesaf i archwilio ymhellach sut y gallwn barhau i ddatblygu a chryfhau ein sefyllfa fel sefydliad sy’n gwrando a gweithio'n agosach gyda chymunedau i wneud newid cadarnhaol.

Mae nifer o enghreifftiau da o'r dull hwn eisoes yn bodoli o fewn Cymunedau Gwledig Creadigol, Tai a'r sgwrs hinsawdd ynghylch Prosiect Sero, ond rydym yn ymdrechu i fod yn fwy uchelgeisiol gyda'r agenda hon. Mae mwy y gallwn ei wneud bob amser. 

Mae'r math hwn o gydweithio yn rhan allweddol o'n Cynllun Cyflawni Blynyddol a rhaglen Ail-lunio, gyda'r Strategaeth Cyfranogiad y Cyhoedd yn cynnig fframwaith ar gyfer sut i fwrw ymlaen â'r gwaith hwn.

Ymhlith cyflawniadau eraill, dyma'r math o feddwl arloesol yr ydym yn bwriadu ei ddathlu yn y Gwobrau Staff sy'n dychwelyd.

Ar ôl bwlch o ddwy flynedd a hanner oherwydd coronafeirws, bydd y seremoni sy'n amlygu llwyddiant y Cyngor unwaith eto yn cael ei chynnal yn Vale Resort ar 30 Medi.

Bydd gwybodaeth am gategorïau a sut i enwebu unigolyn neu dîm ar Staffnet cyn bo hir felly edrychwch eto am fanylion.

O ran cydnabod cyfraniadau staff, hoffwn drosglwyddo fy nymuniadau gorau i un neu ddau o bobl sydd wedi gadael y sefydliad yn ddiweddar.

Mae Anne Lintern, a fu'n gweithio fel Rheolwr Canolfan Adnoddau yn y Gwasanaethau Oedolion, wedi ymddeol ar ôl 26 mlynedd gyda'r Awdurdod, a’r Cydlynydd Gwybodaeth i Dwristiaid Julie Morgan yn ymddeol yn dilyn 22 mlynedd o wasanaeth.

Rwy'n gobeithio y bydd y ddau ohonoch yn mwynhau ymddeoliad hamddenol, hir ac iach gyda mwy o amser i'w dreulio gyda’r teulu a ffrindiau.

Yn olaf, fel bob amser, hoffwn ddiolch i'r holl staff am eu hymdrechion dros y saith diwrnod diwethaf a dymunaf benwythnos pleserus i chi.

Diolch yn fawr iawn,

Rob