Mae llyfrgelloedd Bro Morgannwg yn cynnig gwasanaeth clicio a chasglu 

Mae llyfrgelloedd a gynhelir gan Gyngor Bro Morgannwg nawr yn cynnig gwasanaeth clicio a chasglu sy’n galluogi aelodau i fenthyg llyfrau, llyfrau sain a DVDs.

30 Mehefin 2020

Er eu bod yn parhau ar gau i ymweld â nhw a defnyddio eu cyfleusterau TGCh, bydd llyfrgelloedd yn Y Barri, Penarth a’r Bont-faen ar agor am y gwasanaeth hwn yn benodol o 10am tan 1pm ac o 2pm tan 4pm o ddydd Llun i ddydd Gwener, a bydd llyfrgell Llanilltud Fawr ar agor yn yr un modd rhwng 1pm a 4pm.

Gallwch ofyn am hyd at 5 teitl o bell gan ddefnyddio’r catalog ar-lein a gallwch drefnu apwyntiad casglu ar ôl cael neges e-bost yn cadarnhau bod y llyfrau’n barod. 

Tra bo’r system hon ar waith ni chodir ffioedd benthyg DVDs na llyfrau sain.

Dywedodd y Cynghorydd Lis Burnett, Aelod Cabinet Cyngor Bro Morgannwg dros Addysg ac Adfywio: 

“Rydyn ni’n gwybod pa mor bwysig yw rôl y llyfrgelloedd ym mywydau rhai o’n trigolion, yn arbennig y rheiny sy’n gaeth i’w cartrefi neu sydd wedi’u gwahanu o’u teuluoedd a’u ffrindiau yn y cyfnod anodd hwn.

“Mae darllen yn benodol yn ffordd gynhyrchiol ac ysgogol o lenwi’r amser felly rwy’n falch y gallwn ni nawr gynnig y gwasanaeth clicio a chasglu hwn sy’n galluogi pobl i fenthyg hyd at bum llyfr ar unrhyw adeg.

“Mae llyfrau sain a DVDs hefyd ar gael i’w benthyg drwy’r system ddi-gyswllt hon, a gall y defnyddwyr weld y catalog ar-lein.

"Rydyn ni’n gobeithio y bydd y gwasanaeth newydd hwn o gymorth i drigolion wrth i adeiladau a chyfleusterau eraill y llyfrygelloedd aros ar gau."

Gall defnyddwyr llyfrgelloedd, na allant gyrchu’r catalog ar-lein i gadw eu llyfrau, roi cais dros y ffôn neu drwy e-bost.

Pan fydd yr eitemau’n barod i’w casglu, cânt alwad ffôn neu neges e-bost i drefnu apwyntiad casglu.

Wrth gysylltu â’r llyfrgell dros y ffôn neu drwy e-bost i ofyn am eitemau, dylai aelodau’r llyfrgell roi rhif eu cerdyn llyfrgell, eu rhif ffôn a/neu gyfeiriad e-bost.

Gallant hefyd wneud ceisiadau am lyfrau neu fynegi hoffterau, megis rhoi rhestr o’u hoff awduron, arddulliau neu deitlau penodol.

Bydd staff y llyfrgell wedyn yn creu detholiad o lyfrau i gwsmeriaid eu casglu ar yr amser a drefnir.

Bydd staff yn gwneud eu gorau glas i fodloni gofynion, ond mae’r argyfwng coronafeirws wedi effeithio ar gynhyrchiad a chyflenwad llyfrau newydd ac efallai bod llawer o’r teitlau mwyaf poblogaidd dal ar fenthyg. 

Am y rhesymau hyn mae’r gwasanaeth llyfrgelloedd yn annog pobl i ddychwelyd eu llyfrau cyn gynted â phosibl.

Wrth gasglu eitemau, mae nifer o fesurau wedi’u rhoi ar waith er diogelwch y cwsmeriaid a’r staff.

• Dim ond un aelod o’r aelwyd ddylai ddychwelyd a chasglu eitemau.
• Gellir casglu eitemau dim ond yn ystod yr amser a drefnir er mwyn cadw pellter cymdeithasol drwy osgoi ciwio.
• I leihau amser cyswllt, bydd yr eitemau’n barod i’w casglu o brif fynedfa’r llyfrgell.
• Gellir casglu eitemau dim ond o brif fynedfeydd - mae adeiladau a chyfleusterau eraill y llyfrgelloedd yn parhau ar gau.
• Ni fydd bagiau a chynhwysyddion ailgylchu ar gael o lyfrgelloedd yn ystod yr adeg hon. Gall trigolion archebu bagiau amldro neu gynhwysyddion newydd i’w dosbarthu ar-lein neu drwy ffonio 01446 700111. 
• Ni fydd mynediad i gyfrifiaduron na chyfleusterau argraffu/llungopïo yn ystod yr adeg hon.

Mae'r llyfrgelloedd cymunedol yn Ninas Powys, Y Rhws, Sain Tathan, Sili a Gwenfô yn parhau i fod ar gau am y tro.

Gellir dod o hyd i fanylion cyswllt y Llyfrgell ar y wefan.