Gwasanaeth Gwybodaeth y Fro

Yn ystod y Cyfnod Clo Cenedlaethol, roedd Gwasanaeth Gwybodaeth i Deuluoedd y Fro (FIS) yn wynebu'r her o chwarae rhan allweddol wrth sefydlu gwasanaeth newydd sbon ac, ar yr un pryd, yn ymdopi â'r materion sy'n gysylltiedig â darparu gwasanaeth gwybodaeth rheng flaen wrth weithio gartref, ac mewn rhai achosion – addysg yn y cartref.

Gan gydweithio ag arweinwyr gofal plant, gan gynnwys cydweithwyr o Bartneriaeth Plant a Phobl Ifanc, Dechrau'n Deg, Chwarae ac Addysg, daeth Cynllun Cymorth Gofal Plant y Coronafeirws i'r amlwg i dalu ffioedd gofal plant gweithwyr allweddol cymwys ac ar gyfer plant sy'n agored i niwed. Roedd y cynllun yn galluogi'r rhai sy'n chwarae rhan hanfodol drwy gydol y Pandemig, i weithio, dychwelyd i'r gwaith a/neu gynyddu eu horiau.

Cododd y Tîm i'r her, gan ddatblygu prosesau ymgeisio ac asesu newydd (maes darparu gwasanaethau yn gwbl newydd i holl staff FIS) ac yna dod o hyd i'r gofal plant.

Roedd darparu gwasanaeth teg, cyson ac agored i'r rhai sy'n defnyddio'r cynllun yn golygu bod staff yn mynd i'r afael â'r canllawiau sy'n esblygu gan Lywodraeth Cymru ar gyflymder, gan rannu gwybodaeth a phrofiad gyda chydweithwyr yn glir ac yn gyflym i addasu prosesau a rhoi cyngor ac arweiniad.

Roedd cyfathrebu a chymorth effeithiol a rheolaidd gan arweinydd y Tîm yn sicrhau bod y staff yn rhannu'r weledigaeth ar gyfer y Cynllun ac yn ymfalchïo yn eu cyflawniadau.

Rhwng mis Ebrill a mis Awst 2020, gwnaethom brosesu 442 o geisiadau a gosod 312 o blant mewn gofal plant, gyda 299 ohonynt yn blant i weithwyr allweddol ac roedd 13 ohonynt yn ofal plant 'agored i niwed'.

Mae FIS yn falch iawn o'u cyflawniadau ac mae darparwyr gofal plant a theuluoedd yn cytuno ei fod yn waith da:

"Bob amser rhywun wrth law i ateb unrhyw gwestiynau oedd gen i. Ei gwneud hi'n haws i mi ganolbwyntio ar fy ngwaith yn ystod y cyfnod anodd, doedd dim rhaid i mi boeni am ofal plant.'

'Ni allaf ddiolch digon i FIS am y gefnogaeth a gefais yn ystod y cyfnod clo roedd yn amser unig gyda'r plant gan nad oeddem yn gallu cwrdd ag eraill a oedd yn parhau i weithio a chael yr e-byst ac roedd y galwadau ffôn dal i fyny yn galonogol ein bod i gyd ar yr un tîm yn gwneud ein gorau ac yn cynnig PPE.'